Read Елизаветинская Библия, 1751 Иов 16 Bible Online

Иов 16 - Елизаветинская Библия, 1751 bible

Иов 16

¹Отвещав же иов, рече:

²слышах сицевая многа, утешителие зол вси.

³Что бо? еда чин есть во словесех ветра? или кую ти пакость сотворит, яко отвещаеши?

⁴И аз якоже вы возглаголю: аще бы душа ваша подлежала вместо моея, тогда наскочил бых на вы словесы, покиваю же на вы главою моею.

⁵Буди же крепость во устех моих, движения же устен не пощажу.

⁶Аще бо возглаголю, не возболю ли язвою? аще же и умолчу, чим менше уязвен буду?

⁷Ныне же преутруждена мя сотвори, буя, согнивша, и ят мя.

⁸В послушество бых, и воста во мне лжа моя, противно лицу моему отвеща.

⁹Гневен быв низложи мя, возскрежета зубы на мя, стрелы разбойников его нападоша на мя.

¹⁰Остротою очес наскака, мечем порази мя в колена: вкупе же потекоша на мя:

¹¹предаде бо мя Господь в руки неправедных, нечестивым же поверже мя.

¹²Мирствующа разсыпа мя, взяв мя за власы оборва, постави мя аки примету.

¹³Обыдоша мя копиями бодуще во истесы моя, не щадяще: излияша на землю желчь мою,

¹⁴низложиша мя труп на труп, текоша ко мне могущии,

¹⁵вретище сошиша на кожу мою, и мощь моя на земли угасе.

¹⁶Чрево мое сгоре от плача, на веждах же моих стень смертная,

¹⁷неправедно же ни едино бе в руку моею: молитва же моя чиста.

¹⁸Земле, да не покрыеши над кровию плоти моея, ниже да будет место воплю моему.

¹⁹И ныне се, на небесех послух мой, свидетель же ми во вышних.

²⁰Да приидет моя мольба ко Господу, пред нимже да каплет око мое.

²¹Буди же обличение мужу пред Господем, и сыну человеческому ко ближнему его.

²²Лета же изочтеная приидоша, и путем, имже не возвращуся, пойду.