Read Елизаветинская Библия, 1751 Иов 18 Bible Online

Иов 18 - Елизаветинская Библия, 1751 bible

Иов 18

¹Отвещав же валдад савхейский, рече:

²доколе не престанеши? пожди, да и мы возглаголем.

³И почто аки четвероножная умолчахом пред тобою?

⁴Пребысть ти гнев. что бо? аще ты умреши, не населенна ли будет поднебесная? или превратятся горы из оснований?

⁵И свет нечестивых угаснет, и не произыдет их пламень:

⁶свет его тма в жилищи, светилник же в нем угаснет:

⁷да уловят меншии имения его, погрешит же его совет:

⁸ввержена же бысть нога его в пругло, мрежею да повиется:

⁹да приидут же нань пругла, укрепит нань жаждущих:

¹⁰скрыся в земли уже его, и ятие его на стези.

¹¹Окрест да погубят его болезни: мнози же окрест ног его оыдут во гладе теснем:

¹²падение же ему уготовано велико.

¹³Поядены же да будут плесны ног его, красная же его да пояст смерть.

¹⁴Отторжено же буди от жития его изцеление, да имет же его беда виною царскою.

¹⁵Да вселится в храмине его в нощи его, посыпана да будут лепотная его жупелом:

¹⁶под ним корения его да изсохнут, свыше же нападет пожатие его.

¹⁷Память его да погибнет от земли, и (не) будет имя его на лицы внешнем:

¹⁸да отринет его от света во тму:

¹⁹не будет знаемь в людех его, ниже спасен в поднебесней дом его:

²⁰но в своих ему поживут инии, над ним воздохнуша последнии, первых же объя чудо.

²¹Сии суть домове неправедных, сие же место неведущих Бога.