Read Елизаветинская Библия, 1751 Иов 21 Bible Online

Иов 21 - Елизаветинская Библия, 1751 bible

Иов 21

¹Отвещав же иов, рече:

²послушайте, послушайте словес моих, да не будет ми от вас сие утешение:

³потерпите ми, аз же возглаголю, таже не посмеетемися.

⁴Что бо? еда человеческо ми обличение? или почто не возярюся?

⁵Воззревшии на мя удивитеся, руку положше на ланите.

⁶Аще бо воспомяну, ужаснуся: обдержат бо плоть мою болезни.

⁷Почто нечестивии живут, обетшаша же в богатстве?

⁸Семя их по души, чада же их пред очима.

⁹Домове их обилнии суть, страх же нигде, раны же от Господа несть на них.

¹⁰Говядо их не изверже: спасена же бысть их имущая во чреве и не лишися.

¹¹Пребывают же яко овцы вечныя, дети же их предиграют,

¹²вземше псалтирь и гусли, и веселятся гласом песни.

¹³Скончаша во благих житие свое, в покои же адове успоша.

¹⁴Глаголют же Господеви: отступи от нас, путий твоих ведети не хощем:

¹⁵что достоин, яко да поработаем ему? и кая польза, яко да взыщем его?

¹⁶В руках бо их бяху благая, дел же нечестивых не надзирает.

¹⁷Обаче же и нечестивых светилник угаснет, найдет же им развращение, болезни же их оымут от гнева:

¹⁸будут же аки плевы пред ветром, или якоже прах, егоже взя вихр.

¹⁹Да оскудеют сыном имения его: воздаст противу ему, и уразумеет.

²⁰Да узрят очи его свое убиение, от Господа же да не спасется.

²¹Яко воля его с ним в дому его, и числа месяцей его разделишася.

²²Не Господь ли есть научаяй разуму и хитрости? тойже мудрых разсуждает.

²³Той умрет в силе простоты своея, всецел же благодушествуяй и благоуспеваяй,

²⁴утроба же его исполнена тука, мозг же его разливается.

²⁵Ов же умирает в горести души, не ядый ничтоже блага.

²⁶Вкупе же на земли спят, гнилость же их покры.

²⁷Темже вем вас, яко дерзостию належите ми,

²⁸яко речете: где есть дом княжь? и где есть покров селений нечестивых?

²⁹Вопросите мимоходящих путем, и знамения их не чужда сотворите.

³⁰Яко на день пагубы соблюдается нечестивый, и в день гнева его отведен будет.

³¹Кто возвестит пред лицем его путь его, и еже той сотвори, кто воздаст ему?

³²И той во гроб отнесен бысть, и на гробищих побде.

³³Усладися ему дробное камение потока, и вслед его всяк человек отидет, и пред ним безчисленнии.

³⁴Како же мя утешаете суетными? а еже бы мне почити от вас, ничтоже.