Read Елизаветинская Библия, 1751 Иов 22 Bible Online

Иов 22 - Елизаветинская Библия, 1751 bible

Иов 22

¹Отвещав же елифаз феманитин, рече:

²не Господь ли есть научаяй разуму и хитрости?

³Ибо кое попечение Господу, аще ты был еси делы непорочен? или (кая) польза, яко прост творити будеши путь твой?

⁴или опасение имея от тебе обличит тя и внидет с тобою в суд?

⁵Еда злоба твоя есть не многа? безчисленнии же твои суть греси?

⁶В залог бо имал еси от братии твоея вотще, одежду же нагих отнимал еси,

⁷ниже водою жаждущих напоил еси, но алчущих лишил еси хлеба:

⁸удивлялся же еси неких лицу и повергал еси убогих на земли:

⁹вдовицы же отпустил еси тщы и сироты озлобил еси.

¹⁰Сего ради обыдоша тя сети, и поспеши на тя рать велика:

¹¹свет тебе тма бысть, уснувшаго же вода тя покры.

¹²Еда на высоких живый не призирает? укоризною же возносящихся смири.

¹³И рекл еси: что разуме крепкий? или во мраце разсудит?

¹⁴Облак покров его, и неувидимь будет, и круг небесе обходит.

¹⁵Еда стезю древнюю сохраниши, в нюже ходиша мужие неправедни,

¹⁶иже яти быша прежде времене? река текущая основания их,

¹⁷глаголющии: что сотворит нам Господь? или что нанесет на ны вседержитель?

¹⁸Иже исполнил есть домы их благими: совет же нечестивых далече от него.

¹⁹Видевше праведницы возсмеяшася, непорочен же глумляшеся им:

²⁰не погибе ли имение их, и останки их пояст огнь?

²¹Буди убо тверд, аще претерпиши, потом плод твой будет во благих.

²²Приими же из уст его изречение и восприими словеса его в сердце твое.

²³Аще же обратишися и смириши себе пред Господем, и далече сотвориши от жилища твоего неправду,

²⁴и положен будеши на персти в камени, и якоже камень потока офирска.

²⁵Будет убо тебе вседержитель помощник от враг, чиста же сотворит тя якоже сребро разжжено,

²⁶потом дерзновение возимееши пред Богом, воззрев весело на небо.

²⁷Помольшуся же тебе к нему, услышит тя, даст же ти обеты твоя воздати,

²⁸устроит же ти жилище правды, на путех же твоих будет свет:

²⁹яко смирил еси себе, тогда речеши: вознесеся, и поникша очима спасет,

³⁰избавит неповиннаго, и спасешися чистыма рукама твоима.