Read Елизаветинская Библия, 1751 Иов 27 Bible Online

Иов 27 - Елизаветинская Библия, 1751 bible

Иов 27

¹Еще же приложив иов, рече в притчах:

²жив Господь, иже ми сице суди, и вседержитель, иже огорчи ми душу:

³дондеже еще дыхание мое есть и дух Божий сущий в ноздрех моих,

⁴не возглаголют устне мои беззакония, ниже душа моя поучится неправде.

⁵Не буди мне правдивыми нарещи вас, дондеже умру: не изменю бо незлобия моего.

⁶Правде же внимая, не оставлю ея, не свем бо себе злых соделавша.

⁷Обаче же, дабы были врази мои, якоже низвращение нечестивых, и востающии на мя, якоже пагуба пребеззаконных.

⁸И кая бо есть надежда нечестивому, яко ожидает? надеяся на Господа спасется ли?

⁹или мольбу его услышит Бог? или нашедшей ему беде,

¹⁰еда имать кое дерзновение пред ним? или яко призвавшу ему, услышит ли его?

¹¹Сего ради возвещу вам, что есть в руце Господни, и, еже есть у вседержителя, не солжу.

¹²Се, вси весте, яко тщетная ко тщетным прилагаете.

¹³Сия часть человека нечестиваго от Господа: и жребий сильных приидет от вседержителя на ня.

¹⁴Аще мнози будут сынове их, на заколение будут: аще же и возмужают, нищы будут:

¹⁵оставшиися же ему смертию умрут, и вдовиц их никтоже помилует.

¹⁶Аще соберет якоже землю сребро, и якоже брение уготовит злато,

¹⁷сия вся праведнии одержат, имения же его истиннии возмут:

¹⁸будет же дом его яко молие, и яко паучина, яже снабде.

¹⁹Богатый уснет и не приложит, очи свои отверзе, и несть.

²⁰Обыдоша его якоже вода болезни, нощию же ят его примрак.

²¹Возмет же его вар, и отидет, и возвеет его от места его,

²²и вержет на него, и не пощадит, из руку его бежанием побежит:

²³восплещет нань рукама своима и с шумом возмет его от места своего.