Read Елизаветинская Библия, 1751 Иов 28 Bible Online

Иов 28 - Елизаветинская Библия, 1751 bible

Иов 28

¹Есть бо сребру место, отюнудуже и бывает, и место злату, отюнудуже очищается.

²Железо бо из земли раждается, медь же равно камению сечется.

³Чин положи тме, и вся концы сам испытует, камык тмы и сень смерти.

⁴Пресечение потока от праха: забывающии же путь правый изнемогоша, от человек подвигошася.

⁵Есть земля, из неяже изыдет хлеб: под нею обратися яко огнь.

⁶Место сапфира камение ея, и персть злато ему.

⁷Стезя, не позна ея птица, и не узре ю око супово,

⁸и не ходиша по ней сынове величавых, и не прейде по ней лев.

⁹На несекоме камени простре руку свою, преврати же из корения горы:

¹⁰бреги рек расторже, всякое же честное виде око мое:

¹¹глубины же рек откры и показа силу свою на свет.

¹²Премудрость же откуду обретеся? и кое место есть ведения?

¹³Не весть человек пути ея, ниже обретеся в человецех.

¹⁴Бездна рече: несть во мне: и море рече: несть со мною.

¹⁵Не дастся сокровище за ню, и не извесится сребро на изменение ея,

¹⁶и не сравнится со златом софирским, со ониксом честным и сапфиром:

¹⁷не равно будет ей злато и кристаль, и изменение ея сосуди злати.

¹⁸Превысокая и бисерие не помянутся, и притяжи премудрость паче внутреннейших:

¹⁹не уравнится ей топазий ефиопский, со златом чистым не сравнится.

²⁰Премудрость же откуду обретеся? и кое место есть разуму?

²¹Утаися от всякаго человека, и от птиц небесных скрыся.

²²Пагуба и смерть рекосте: слышахом ея славу.

²³Бог благо позна ея путь: сам бо весть место ея.

²⁴Ибо сам поднебесную всю надзирает, ведый, яже на земли, вся, яже сотвори.

²⁵Ветров вес и воде меру егда сотворил,

²⁶тако видяй сочте, и путь в сотрясении гласов,

²⁷тогда виде ю и поведа ю, уготовав изследи

²⁸и рече человеку: се, благочестие есть премудрость, а еже удалятися от зла есть ведение.