Read Елизаветинская Библия, 1751 Иов 29 Bible Online

Иов 29 - Елизаветинская Библия, 1751 bible

Иов 29

¹Еще же приложив иов, рече в притчах:

²кто мя устроит по месяцам преждних дний, в нихже мя Бог храняше,

³якоже егда светяшеся светилник его над главою моею, егда светом его хождах во тме,

⁴егда бех тяжек в путех, егда Бог посещение творяше дому моему,

⁵егда бех богат зело, окрест же мене раби,

⁶егда обливахуся путие мои маслом кравиим, горы же моя обливахуся млеком,

⁷егда исхождах изутра во град, на стогнах же поставляшеся ми престол?

⁸Видяще мя юноши скрывашася, старейшины же вси воставаша:

⁹вельможи же преставаху глаголати, перст возложше на уста своя.

¹⁰Слышавшии же блажиша мя, и язык их прильпе гортани их:

¹¹яко ухо слыша и ублажи мя, око же видев мя уклонися.

¹²Спасох бо убогаго от руки сильнаго, и сироте, емуже не бе помощника, помогох.

¹³Благословение погибающаго на мя да приидет, уста же вдовича благословиша мя.

¹⁴В правду же облачахся, одевахся же в суд яко в ризу.

¹⁵Око бех слепым, нога же хромым:

¹⁶аз бых отец немощным, распрю же, еяже не ведях, изследих:

¹⁷сотрох же членовныя неправедных, от среды же зубов их грабление изях.

¹⁸Рех же: возраст мой состареется якоже стебло финиково, многа лета поживу.

¹⁹Корень разверзеся при воде, и роса пребудет на жатве моей.

²⁰Слава моя нова со мною, и лук мой в руце моей пойдет.

²¹(Старейшины) слышавшии мя внимаху, молчаху же о моем совете.

²²К моему глаголу не прилагаху, радовахуся же, егда к ним глаголах:

²³якоже земля жаждущая ожидает дождя, тако сии моего глаголания.

²⁴Аще возсмеюся к ним, не вериша: и свет лица моего не отпадаше.

²⁵Избрах путь их, и седех князь, и вселяхся якоже царь посреде храбрых, аки утешаяй печальных.