Read Елизаветинская Библия, 1751 Иов 30 Bible Online

Иов 30 - Елизаветинская Библия, 1751 bible

Иов 30

¹Ныне же поругашамися малейшии: ныне учат мя от части, ихже отцев уничтожах, ихже не вменях достойными псов моих стад.

²Крепость же рук их во что мне бысть? у них погибаше скончание.

³В скудости и гладе безплоден: иже бежаху в безводное вчера сотеснение и бедность:

⁴иже обхождаху былие в дебрех, имже былие бяше брашно, безчестнии же и похуленнии, скудни всякаго блага, иже и корение древес жваху от глада великаго.

⁵Восташа на мя татие,

⁶ихже домове беша пещеры каменны:

⁷от среды доброгласных возопиют, иже под хврастием дивиим живяху:

⁸безумных сынове и безчестных, имя и слава угашена на земли.

⁹Ныне же гусли есмь аз им, и мене в притчу имут:

¹⁰возгнушалися же мною отступивше далече, ни лица моего пощадеша от плюновения.

¹¹Отверз бо тул свой уязви мя, и узду устам моим наложи.

¹²На десную отрасли восташа, нозе свои простроша и путесотвориша на мя стези пагубы своея.

¹³Сотрошася стези моя, совлекоша бо ми одежду.

¹⁴Стрелами своими устрели мя: сотвори ми, якоже восхоте: в болезнех скисохся, обращаются же ми скорби.

¹⁵Отиде ми надежда якоже ветр, и якоже облак спасение мое.

¹⁶И ныне на мя излиется душа моя: и одержат мя дние печалей:

¹⁷нощию же кости моя смятошася, жилы же моя разслабеша.

¹⁸Многою крепостию ятся за ризу мою: якоже ожерелие ризы моея объя мя.

¹⁹Вменяеши же мя равна брению, в земли и пепеле часть моя.

²⁰Возопих же к тебе, и не услышал мя еси: сташа же и смотриша на мя.

²¹Наидоша же на мя без милости, рукою крепкою уязвил мя еси:

²²вчинил же мя еси в болезнех и отвергл еси мя от спасения.

²³Вем бо, яко смерть мя сотрет: дом бо всякому смертну земля.

²⁴Аще бы возможно было, сам бых себе убил, или молил бых иного, дабы ми то сотворил.

²⁵Аз же о всяцем немощнем восплакахся, воздохнух же видев мужа в бедах.

²⁶Аз же ждах благих, и се, сретоша мя паче дние зол.

²⁷Чрево мое воскипе и не умолчит: предвариша мя дние нищеты.

²⁸Стеня ходих без обуздания, стоях же в соборе вопия.

²⁹Брат бых сиринам, друг же птичий.

³⁰Кожа же моя помрачися вельми, и кости моя сгореша от зноя.

³¹Обратишася же в плачь гусли моя, песнь же моя в рыдание мне.