Read Елизаветинская Библия, 1751 Иов 31 Bible Online

Иов 31 - Елизаветинская Библия, 1751 bible

Иов 31

¹Завет положих очима моима, да не помышлю на девицу.

²И что удели Бог свыше, и наследие всесильнаго от вышних?

³Увы, пагуба неправдивому и отчуждение творящым беззаконие.

⁴Не сам ли узрит путь мой и вся стопы моя изочтет?

⁵Аще ходих с посмеятели, и аще потщася нога моя на лесть,

⁶стах бо на мериле праведне, виде же Господь незлобие мое.

⁷Аще уклонися нога моя от пути, аще и вслед ока моего иде сердце мое, и аще рукама моима прикоснухся даров,

⁸да посею убо, а инии да поядят, без корене же да бых был на земли.

⁹Аще вслед иде сердце мое жены мужа инаго, и аще приседяй бых при дверех ея,

¹⁰угодна убо буди и жена моя иному мужу, младенцы же мои смирени да будут:

¹¹ярость бо гнева не удержана, еже осквернити мужа инаго жену:

¹²огнь бо есть горяй на вся страны, идеже найдет, из корения погубит.

¹³Аще же презрех суд раба моего или рабыни, прящымся им предо мною:

¹⁴что бо сотворю, аще испытание сотворит ми Господь? аще же и посещение, кий ответ сотворю?

¹⁵Еда не якоже и аз бех во чреве, и тии быша? бехом же в томже чреве.

¹⁶Немощнии же, аще когда чесого требоваху, не не получиша, вдовича же ока не презрех.

¹⁷Аще же и хлеб мой ядох един и сирому не преподах от него:

¹⁸понеже от юности моея кормих якоже отец, и от чрева матере моея наставлях:

¹⁹аще же презрех нага погибающа и не облекох его:

²⁰немощнии же аще не благословиша мя, от стрижения же агнцев моих согрешася плещы их:

²¹аще воздвигох на сироту руку, надеяся, яко многа помощь мне есть:

²²да отпадет убо рамо мое от состава, мышца же моя от лактя да сокрушится:

²³страх бо Господень объя мя, и от тягости его не стерплю.

²⁴Аще вчиних злато в крепость мою и аще на камения многоценная надеяхся,

²⁵аще же и возвеселихся, многу ми богатству сущу, аще же и на безчисленных положих руку мою:

²⁶или не видим солнца возсиявшаго оскудевающа, луны же умаляющияся? не в них бо есть:

²⁷и аще прельстися отай сердце мое, аще и руку мою положив на устах моих лобзах:

²⁸и сие ми убо в беззаконие превелие да вменится, яко солгах пред Богом вышним.

²⁹Аще же обрадовахся о падении враг моих, и рече сердце мое: благоже, благоже:

³⁰да услышит убо ухо мое клятву мою, озлославлен же да буду от людий моих озлобляемь.

³¹Аще же и многажды реша рабыни моя: кто убо дал бы нам от плотей его насытитися, зело мне благу сущу?

³²И вне не водворяшеся странник, дверь же моя всякому приходящему отверста бе.

³³Аще же и согрешая неволею, скрых грех мой:

³⁴не посрамихся бо народнаго множества, еже не поведати пред ними: аще же и оставих маломощнаго изыти из дверий моих тщим недром: (аще бы не убоялся).

³⁵Кто даст слушающаго мене? руки же Господни аще бых не убоялся, писание же, еже имех на кого,

³⁶на плещах возложив аки венец, читах,

³⁷и аще не раздрав его отдах, ничтоже взем от должника:

³⁸аще на мя когда земля возстена, аще и бразды ея восплакашася вкупе:

³⁹аще и силу ея ядох един без цены, или аще и душу господина земли взем оскорбих:

⁴⁰вместо пшеницы да взыдет ми кропива, а вместо ячменя терние.