Read Елизаветинская Библия, 1751 Иов 32 Bible Online

Иов 32 - Елизаветинская Библия, 1751 bible

Иов 32

¹И умолча иов словесы. Умолчаша же и трие друзие его ктому пререковати иову, бе бо иов праведен пред ними.

²Разгневася же елиус сын варахиилев вузитянин, от ужичества арамска авситидийския страны, разгневася же на иова зело, занеже нарече себе праведна пред Богом,

³и на триех же другов разгневася зело, яко не возмогоша отвещати противу иову и судиша его быти нечестива.

⁴Елиус же терпяше дати ответ иову, яко старейшии его суть деньми (друзие его).

⁵И виде елиус, яко несть ответа во устех триех мужей, и возярися гневом своим.

⁶Отвещав же елиус сын варахиилев вузитянин, рече: юнейший убо есмь леты, вы же есте старейшии: темже молчах, убоявся возвестити вам хитрость мою:

⁷рех же: время есть глаголющее, и во мнозех летех ведят премудрость,

⁸но дух есть в человецех, дыхание же вседержителево есть научающее:

⁹не многолетнии суть премудри, ниже старии ведят суд:

¹⁰темже рех: послушайте мене, и возвещу вам, яже вем, внушите глаголы моя:

¹¹реку бо вам послушающым, дондеже испытаете словеса, и даже вас уразумею,

¹²и се, не бе иова обличаяй, отвещаяй противно глаголом его от вас:

¹³да не речете: обретохом премудрость, Господеви приложившеся:

¹⁴человеку же попустисте глаголати таковая словеса:

¹⁵ужаснушася, не отвещаша ктому, обетшаша от них словеса:

¹⁶терпех, не глаголах бо, яко сташа, не отвещаша, яко да отвещаю и аз часть.

¹⁷Отвеща же елиус, глаголя:

¹⁸паки возглаголю, исполнен бо есмь словес: убивает бо мя дух чрева:

¹⁹чрево же мое яко мех мста вряща завязан, или якоже мех коваческий расторгнутый:

²⁰возглаголю, да почию, отверз уста:

²¹человека бо не постыждуся, но ниже бреннаго посрамлюся:

²²не вем бо чудитися лицу: аще же ни, то и мене молие изядят.