Read Елизаветинская Библия, 1751 Иов 35 Bible Online

Иов 35 - Елизаветинская Библия, 1751 bible

Иов 35

¹Отвещав же еще елиус, рече:

²что сие мнил еси на суде? ты кто еси, яко рекл еси: прав есмь пред Господем?

³Или речеши: что сотворю согрешив?

⁴Аз же ти дам ответ и трием другом твоим.

⁵Воззри на небо и виждь: смотри же на облаки, коль высоки суть от тебе.

⁶Аще согрешил еси, что сотвориши? аще же и много беззаконновал еси, что можеши сотворити?

⁷Понеже убо праведен еси, что даси ему? или что из руки твоея возмет?

⁸Мужеви подобному тебе нечестие твое, и сыну человеческому правда твоя.

⁹От множества оклеветаемии воззовут, возопиют от мышцы многих:

¹⁰и не рече: где есть Бог сотворивый мя, устрояяй стражбы нощныя,

¹¹отделяяй мя от четвероногих земных и от небесных птиц?

¹²тамо воззовут, и не имаши услышати, и от досады злых.

¹³Безместная бо видети не хощет Господь: сам бо вседержитель зритель есть творящих беззаконная, и спасет мя.

¹⁴Судися же пред ним, аще можеши похвалити его, якоже есть и ныне.

¹⁵Яко несть посещаяй гневом своим, и не позна прегрешения коеголибо зело.

¹⁶Еов же всуе отверзает уста своя, неведением словеса отягощает.