Read Елизаветинская Библия, 1751 Иов 36 Bible Online

Иов 36 - Елизаветинская Библия, 1751 bible

Иов 36

¹Приложив же еще елиус, рече:

²пожди ми мало еще, да тя научу: еще бо у мене есть слово.

³Приим хитрость мою отдалеча, делы же моими праведная реку воистинну:

⁴и не неправедны глаголы без правды уразумееши.

⁵Виждь же, яко Господь не отринет незлобиваго:

⁶силен крепостию сердца нечестивых не оживит и суд нищым даст,

⁷не отимет от правдиваго очес своих, и со цари на престоле посадит их на победу, и вознесутся.

⁸Связаннии в ручных узах яти будут ужами нищеты,

⁹и возвестит им дела их и прегрешение их, яко укрепятся:

¹⁰но правдиваго услышит, и рече, яко обратятся от неправды.

¹¹Аще услышат и поработают, скончают дни своя во благих и лета своя в благолепоте:

¹²нечестивых же не спасет, зане не хотеша познати Господа и занеже учими не послушливи беша.

¹³И лицемери сердцем возмутят ярость: не возопиют, яко связа их:

¹⁴да умрет убо в юности душа их, житие же их уязвляемо ангелы,

¹⁵занеже оскорбиша недужна и немощна, суд же кротких изложит.

¹⁶Еще же исторгну тя от уст вражиих: бездна, пролитие под нею, и сниде трапеза твоя исполнена тука.

¹⁷Не оскудеет же от праведных суд:

¹⁸ярость же на нечестивыя будет, нечестия ради даров их, ихже приимаху на неправде.

¹⁹Да не уклонит тя волею ум от мольбы в беде сущих немощных и всех содержащих крепость.

²⁰Не привлецы нощи, еже взыти людем вместо их:

²¹но сохранися, да не содееши зла: сих бо ради изят еси от нищеты.

²²Се, крепкий удержит крепостию своею: кто бо есть, якоже той, силен?

²³и кто есть испытуяй дел его? или кто рекий: содея неправду?

²⁴Помяни, яко велия дела его суть, имиже владеша мужие.

²⁵Всяк человек видит в себе, елицы уязвляеми суть человецы.

²⁶Се, крепкий великий, и не увемы: число лет его безконечное:

²⁷изочтенны же ему суть капли дождевныя, и излиются дождем во облак:

²⁸потекут обетшания, осениша же облацы над премногими людьми: время постави скоту, ведят же ложа чин. О всех сих не дивитлитися ум, и не изменяетлися ти сердце от тела?

²⁹И аще уразумеет простертие облака, равенство скинии его:

³⁰се, простирает на ню свет и корения морская покры:

³¹теми бо судит людем, даст пищу могущему.

³²На руку покры свет и заповеда о нем сретающему:

³³возвестит о нем другу своему Господь, стяжание, и о неправде.