Read Елизаветинская Библия, 1751 Иов 37 Bible Online

Иов 37 - Елизаветинская Библия, 1751 bible

Иов 37

¹И от сих возмятеся сердце мое и отторжеся от места своего.

²Послушай слуха во гневе ярости Господни, и поучение изо уст его изыдет.

³Под всем небом началство его, и свет его на крилу земли.

⁴Вслед его возопиет гласом, возгремит гласом величия своего, и не изменит их, яко услышит глас его.

⁵Возгремит крепкий гласом своим дивная: сотвори бо велия, ихже не ведахом.

⁶Повелеваяй снегу: буди на земли, и буря дождя, и буря дождев могутства его.

⁷В руце всякаго человека знаменает, да познает всяк человек свою немощь.

⁸Внидоша же зверие под кров и умолкоша на ложи.

⁹Из хранилищ внутренних находят болезни, и от внешних стран студень.

¹⁰И от дыхания крепка даст лед: управляет же воду, якоже хощет,

¹¹и избранное устрояет облак: разженет облак свет его,

¹²и сам окрестная превратит, якоже хощет, в дела их: вся, елика заповесть им, сия чиноположена суть от него на земли,

¹³аще в наказание, аще на землю свою, аще на милость обрящет и.

¹⁴Внуши сия, иове: стани учайся силе Господни.

¹⁵Вемы, яко Господь положи дела своя, свет сотворив из тмы.

¹⁶Весть же различие облаков и велия падения злых.

¹⁷Твоя же одежда тепла, почивает же на земли от юга.

¹⁸Утверждения с ним в древности, крепка якоже видение слития.

¹⁹Чесо ради, научи мя, что речем ему? и престанем многа глаголюще.

²⁰Еда книга, или книгочиа ми предстоит? да стоящь сотворю человеку молчати.

²¹Не всем же видимь свет: светлый есть в древностех, якоже еже от него на облацех.

²²От севера облацы златозарни: в сих велия слава и честь вседержителева.

²³И не обретаем иного подобна крепости его: иже судит праведно, мниши ли, яко не слышит той?

²⁴Темже убоятся его человецы: убоятся же его и премудрии сердцем.