Read Елизаветинская Библия, 1751 Иов 38 Bible Online

Иов 38 - Елизаветинская Библия, 1751 bible

Иов 38

¹Преставшу же елиусу от беседы, рече Господь иову сквозе бурю и облаки:

²кто сей скрываяй от мене совет, содержай же глаголы в сердцы, мене же ли мнится утаити?

³Препояши яко муж чресла твоя: вопрошу же тя, ты же ми отвещай.

⁴Где был еси, егда основах землю? возвести ми, аще веси разум.

⁵Кто положи меры ея, аще веси? или кто наведый вервь на ню?

⁶На чемже столпи ея утверждени суть? ктоже есть положивый камень краеуголный на ней?

⁷Егда (сотворены) быша звезды, восхвалиша мя гласом велиим вси ангели мои.

⁸Заградих же море враты, егда изливашеся из чрева матере своея исходящее:

⁹положих же ему облак во одеяние, мглою же пових е:

¹⁰и положих ему пределы, обложив затворы и врата:

¹¹рех же ему: до сего дойдеши и не прейдеши, но в тебе сокрушатся волны твоя.

¹²Или при тебе составих свет утренний, денница же весть чин свой,

¹³ятися крил земли, оттрясти нечестивыя от нея?

¹⁴Или ты, брение взем, от земли создал еси животно, и глаголиваго сего посадил еси на земли?

¹⁵Отял же ли еси от нечестивых свет, мышцу же гордых сокрушил ли еси?

¹⁶Пришел же ли еси на источники моря, во следах же бездны ходил ли еси?

¹⁷Отверзаются же ли тебе страхом врата смертная, вратницы же адовы видевше тя убояшася ли?

¹⁸Навыкл же ли еси широты поднебесныя? Повеждь убо ми, колика есть?

¹⁹В коей же земли вселяется свет, тме же кое есть место?

²⁰Аще убо введеши мя в пределы их, аще же ли и веси стези их?

²¹Вем убо, яко тогда рожден еси, число же лет твоих много.

²²Пришел же ли еси в сокровища снежная, и сокровища градная видел ли еси?

²³подлежат же ли тебе в час врагов, в день браней и рати?

²⁴Откуду же исходит слана, или разсыпается юг на поднебесную?

²⁵Кто же уготова дождю велию пролияние, и путь молнии и грома,

²⁶одождити на землю, на нейже несть мужа, пустыню, идеже человека несть в ней,

²⁷насытити непроходиму и ненаселену, и прозябнути исход злака?

²⁸Кто есть дождю отец? кто же есть родивый капли росныя?

²⁹Из чиего чрева исходит лед? Слану же на небеси кто родил,

³⁰яже нисходит яко вода текущая? Лице нечестива кто устраши?

³¹Разумел же ли еси соуз плиад, и ограждение орионово отверзл ли еси?

³²Или отверзеши знамения небесная во время свое? и вечернюю звезду за власы ея привлечеши ли?

³³Веси же ли пременения небесная, или бывающая вкупе под небесем?

³⁴Призовеши же ли облак гласом? и трепетом воды великия послушает ли тя?

³⁵Послеши же ли молнии, и пойдут? рекут же ли ти: что есть?

³⁶Кто же дал есть женам ткания мудрость, или испещрения хитрость?

³⁷Кто же изчисляяй облаки премудростию, небо же на землю преклонил,

³⁸разлияся же яко земля прах, спаях же е, аки каменем, на четыри углы?

³⁹Уловиши же ли львам ядь, и душы змиев насытиши ли?

⁴⁰убояшася бо на ложах своих и седят в дебрех уловляюще.

⁴¹Кто же врану уготова пищу? птичищи бо его ко Господу воззваша, облетающе брашна ищуще.