Read Елизаветинская Библия, 1751 Иов 4 Bible Online

Иов 4 - Елизаветинская Библия, 1751 bible

Иов 4

¹Отвеща же елифаз феманитин, глаголя:

²еда множицею глаголано ти бысть в труде? тяжести же глагол твоих кто стерпит?

³аще бо ты научил еси многи и руце немощных утешил еси,

⁴немощныя же воздвигл еси словесы, коленом же немощным силу обложил еси.

⁵Ныне же прииде на тя болезнь и коснуся тебе, ты же возмутился еси.

⁶Еда страх твой есть не в безумии, и надежда твоя и злоба пути твоего?

⁷Помяни убо, кто чист сый погибе? или когда истиннии вси из корене погибоша?

⁸Якоже видех орющих неподобная, сеющии же я болезни пожнут себе,

⁹от повеления Господня погибнут, от духа же гнева его изчезнут.

¹⁰Сила львова, глас же львицы, веселие же змиев угасе:

¹¹мраволев погибе, занеже не имеяше брашна, скимни же львовы оставиша друг другу.

¹²Аще же глагол кий истинен бе во словесех твоих, ни коеже бы от сих тя сретило зло. не приимет ли ухо мое предивных от него?

¹³Страхом же и гласом нощным, нападающь страх на человеки,

¹⁴ужас же мя срете и трепет, и зело кости моя стрясе:

¹⁵и дух на лице ми найде: устрашишася же ми власи и плоти,

¹⁶востах и не разумех, видех, и не бе обличия пред очима моима, но токмо дух тих и глас слышах:

¹⁷что бо? еда чист будет человек пред Богом? или в делех своих без порока муж?

¹⁸аще рабом своим не верует, и во ангелех своих стропотно что усмотре,

¹⁹живущих же в бренных храминах, от нихже и мы сами от тогожде брения есмы, порази, якоже молие,

²⁰и от утра даже до вечера ктому не суть: занеже не могоша себе помощи, погибоша:

²¹дхну бо на ня, и изсхоша, и понеже не имеяху премудрости, погибоша.