Read Елизаветинская Библия, 1751 Иов 5 Bible Online

Иов 5 - Елизаветинская Библия, 1751 bible

Иов 5

¹Призови же, аще кто тя услышит, или аще кого от святых ангел узриши.

²Безумнаго бо убивает гнев, заблуждшаго же умерщвляет рвение.

³Аз же видех безумных укореняющихся, но абие поядено бысть их жилище.

⁴Далече да будут сынове их от спасения, и да сотрутся при дверех хуждших, и не будет изимаяй.

⁵Иже бо они собраша, праведницы поядят, сами же от зол не изяти будут: изможденна буди крепость их.

⁶Не имать бо от земли изыти труд, ни от гор прозябнути болезнь:

⁷но человек раждается на труд, птенцы же суповы высоко парят.

⁸Обаче же аз помолюся Богови, Господа же всех Владыку призову,

⁹творящаго велия и неизследимая, славная же и изрядная, имже несть числа:

¹⁰дающаго дождь на землю, посылающаго воду на поднебесную:

¹¹возносящаго смиренныя на высоту и погибшыя воздвизающаго во спасение:

¹²расточающаго советы лукавых, да не сотворят руце их истины.

¹³Уловляяй премудрых в мудрости их, совет же коварных разори.

¹⁴Во дни обымет их тма, в полудне же да осяжут якоже в нощи,

¹⁵и да погибнут на брани: немощный же да изыдет из руки сильнаго.

¹⁶Буди же немощному надежда, неправеднаго же уста да заградятся.

¹⁷Блажен же человек, егоже обличи Бог, наказания же вседержителева не отвращайся:

¹⁸той бо болети творит и паки возставляет: порази, и руце его изцелят:

¹⁹шестижды от бед измет тя, в седмем же не коснеттися зло:

²⁰во гладе избавит тя от смерти, на брани же из руки железа изрешит тя:

²¹от бича языка скрыет тя, и не убоишися от зол находящих:

²²неправедным и беззаконным посмеешися, от дивиих же зверей не убоишися,

²³зане с камением дивиим завет твой: зверие бо дивии примирятся тебе.

²⁴Потом уразумееши, яко в мире будет дом твой, жилище же храмины твоея не имать согрешити:

²⁵уразумееши же, яко много семя твое, и чада твоя будут яко весь злак селный:

²⁶внидеши же во гроб якоже пшеница созрелая во время пожатая, или якоже стог гумна во время свезенный.

²⁷Се, сия сице изследихом: сия суть, яже слышахом: ты же разумей себе, аще что сотворил еси.