Read Елизаветинская Библия, 1751 Иов 7 Bible Online

Иов 7 - Елизаветинская Библия, 1751 bible

Иов 7

¹Не искушение ли житие человеку на земли, и якоже наемника повседневнаго жизнь его?

²или якоже раб бояйся Господа своего и улучив сень? или якоже наемник ждый мзды своея?

³такожде и аз ждах месяцы тщы, нощи же болезней даны ми суть.

⁴Аще усну, глаголю: когда день? егда же востану, паки: когда вечер? исполнен же бываю болезней от вечера до утра.

⁵Месится же мое тело в гнои червей, обливаю же грудие земли, гной стружа.

⁶Житие же мое есть скоряе беседы, погибе же во тщей надежди.

⁷Помяни убо, яко дух мой живот, и ктому не возвратится око мое видети благая.

⁸Не узрит мене око видящаго мя: очи твои на мне, и ктому несмь,

⁹якоже облак очищен от небесе: аще бо человек снидет во ад, ктому не взыдет,

¹⁰ни возвратится во свой дом, ниже имать его познати ктому место его.

¹¹Убо ниже аз пощажу уст моих, возглаголю в нужди сый, отверзу уста моя горестию души моея сотеснен.

¹²Еда море есмь, или змий, яко учинил еси на мя хранение?

¹³Рекох, яко утешит мя одр мой, произнесу же ко мне на едине слово на ложи моем:

¹⁴устрашаеши мя сониями и видениями ужасаеши мя:

¹⁵свободиши от духа моего душу мою, от смерти же кости моя.

¹⁶Не поживу бо во век, да долготерплю: отступи от мене, тще бо житие мое.

¹⁷Что бо есть человек, яко возвеличил еси его? или яко внимаеши умом к нему?

¹⁸или посещение твориши ему по всяко утро и в покои судити его имаши?

¹⁹Доколе не оставиши мене, ниже отпускаеши мя, дондеже поглощу слины моя в болезни?

²⁰Аще аз согреших, что тебе возмогу соделати, сведый ум человечь? почто мя еси положил прекословна тебе, и есмь тебе бременем?

²¹почто неси сотворил беззаконию моему забвения, и очищения греха моего? ныне же в землю отиду, утренюяй же несмь ктому.