Read Елизаветинская Библия, 1751 Иов 8 Bible Online

Иов 8 - Елизаветинская Библия, 1751 bible

Иов 8

¹Отвещав же валдад савхейский, рече: доколе глаголати будеши сия?

²дух многоглаголив во устех твоих.

³Еда Господь обидит судяй? или вся сотворивый возмятет правду?

⁴Аще сынове твои согрешиша пред ним, посла руку на беззакония их:

⁵ты же утренюй ко Господу вседержителю моляся:

⁶аще чист еси и истинен, молитву твою услышит, устроит же ти паки житие правды:

⁷будут убо первая твоя мала, последняя же твоя без числа.

⁸Вопроси бо рода перваго, изследи же по роду отцев:

⁹вчерашни бо есмы и не вемы, сень бо есть наше житие на земли:

¹⁰не сии ли научат тя и возвестят ти и от сердца изнесут словеса?

¹¹Еда произничет рогоз без воды, или растет ситник без напаяния?

¹²еще сущу на корени, и не пожнется ли? прежде напаяния всякое былие не изсыхает ли?

¹³тако убо будут последняя всех забывающих Господа: надежда бо нечестиваго погибнет:

¹⁴не населен бо будет дом его, паучина же сбудется селение его.

¹⁵Аще подпрет храмину свою, не станет: емшуся же ему за ню, не пребудет.

¹⁶Влажный бо есть под солнцем, и от тления его леторасль его изыдет:

¹⁷на собрании камения спит, посреде же кремения поживет:

¹⁸аще поглотит место, солжет ему, не видел еси таковая,

¹⁹яко превращение нечестиваго таково, из земли же инаго произрастит.

²⁰Господь бо не отринет незлобиваго: всякаго же дара от нечестиваго не приимет.

²¹Истинным же уста исполнит смеха, устне же их исповедания.

²²Врази же их облекутся в студ: жилище же нечестиваго не будет.