Read Елизаветинская Библия, 1751 Иов 9 Bible Online

Иов 9 - Елизаветинская Библия, 1751 bible

Иов 9

¹Отвещав же иов, рече:

²воистинну вем, яко тако есть: како бо будет праведен человек у Господа?

³аще бо восхощет судитися с ним, не послушает его, да не преречет ко единому словеси его от тысящи.

⁴Премудр бо есть мыслию, крепок же и велик: кто жесток быв противу его, пребысть?

⁵Обетшаяй горы, и не ведят, превращаяй я гневом:

⁶трясый поднебесную из оснований, столпи же ея колеблются:

⁷глаголяй солнцу, и не восходит, звезды же печатствует:

⁸прострый един небо и ходяй но морю, яко по земли:

⁹творяй плиады и еспера, и арктура и сокровища южная:

¹⁰творяй велия и неизследованная, славная же и изрядная, имже несть числа.

¹¹Аще приидет ко мне, не имам видети: и аще мимоидет мене, никако уразумех.

¹²Аще возмет, кто возвратит? или кто речет ему: что сотворил еси?

¹³Сам бо отвращает гнев, слякошася под ним кити поднебеснии.

¹⁴Аще же мя услышит, или разсудит глаголы моя?

¹⁵Аще бо и праведен буду, не услышит мене, суду его помолюся:

¹⁶аще же воззову, и услышит мя, не иму веры, яко услыша глас мой.

¹⁷Да не мглою мя потребит, многа же ми сотрения сотвори всуе,

¹⁸не оставляет бо мя отдохнути, исполни же мя горести.

¹⁹Понеже силен есть крепостию: кто убо суду его воспротивится?

²⁰Аще бо буду праведен, уста моя нечестия сотворят: аще же буду непорочен, стропотен буду.

²¹Аще бо нечестие сотворих, не вем душею моею: обаче отемлется ми живот.

²²Темже рех: велика и сильна губит гнев.

²³Яко лукавии смертию лютою погибнут, обаче праведным посмеваются.

²⁴Предана есть земля в руце нечестиваго, лица судий ея покрывает: аще же не сам есть, кто есть?

²⁵Житие же мое есть легчае скоротечца: отбегоша и не видеша.

²⁶Или есть кораблем след пути, или орла летяща, ищуща яди?

²⁷Аще бо реку: забуду глаголя, приникнув лицем воздохну,

²⁸трясуся всеми удесы: вем бо, яко не безвинна мя оставиши.

²⁹Аще же нечестив есмь, почто не умрох?

³⁰Аще бо измыюся снегом и очищуся руками чистыми,

³¹доволно во скверне омочил мя еси, возгнушася же мною одежда моя.

³²Неси бо человек, якоже аз, емуже противопрюся, да приидем вкупе на суд.

³³о, дабы ходатай нам был, и обличаяй и разслушаяй между обема.

³⁴Да отимет от мене жезл, страх же его да не смущает мене:

³⁵и не убоюся, но возглаголю, ибо тако не вем сам себе.