Read Елизаветинская Библия, 1751 Псалтирь 102 Bible Online

Псалтирь 102 - Елизаветинская Библия, 1751 bible

Псалтирь 102

¹Благослови, душе моя, Господа, и вся внутренняя моя, имя святое его:

²благослови, душе моя, Господа, и не забывай всех воздаяний его:

³очищающаго вся беззакония твоя, изцеляющаго вся недуги твоя,

⁴избавляющаго от истления живот твой, венчающаго тя милостию и щедротами,

⁵исполняющаго во благих желание твое: обновится яко орля юность твоя.

⁶Творяй милостыни Господь и судбу всем обидимым.

⁷Сказа пути своя моисеови, сыновом израилевым хотения своя.

⁸Щедр и милостив Господь, долготерпелив и многомилостив.

⁹Не до конца прогневается, ниже во век враждует:

¹⁰не по беззаконием нашым сотворил есть нам, ниже по грехом нашым воздал есть нам.

¹¹Яко по высоте небесней от земли, утвердил есть Господь милость свою на боящихся его:

¹²елико отстоят востоцы от запад, удалил есть от нас беззакония наша.

¹³Якоже щедрит отец сыны, ущедри Господь боящихся его.

¹⁴Яко той позна создание наше, помяну, яко персть есмы.

¹⁵Человек, яко трава дние его, яко цвет селный, тако оцветет:

¹⁶яко дух пройде в нем, и не будет, и не познает ктому места своего.

¹⁷Милость же Господня от века и до века на боящихся его,

¹⁸и правда его на сынех сынов, хранящих завет его и помнящих заповеди его творити я.

¹⁹Господь на небеси уготова престол свой, и Царство его всеми обладает.

²⁰Благословите Господа, вси ангели его, сильнии крепостию, творящии слово его, услышати глас словес его.

²¹Благословите Господа, вся силы его, слуги его, творящии волю его.

²²Благословите Господа, вся дела его на всяком месте владычества его: благослови, душе моя, Господа.