Read Елизаветинская Библия, 1751 Псалтирь 29 Bible Online

Псалтирь 29 - Елизаветинская Библия, 1751 bible

Псалтирь 29

¹Псалом песни обновления дому давидова.

²Вознесу тя, Господи, яко подял мя еси, и не возвеселил еси врагов моих о мне.

³Господи Боже мой, воззвах к тебе, и изцелил мя еси.

⁴Господи, возвел еси от ада душу мою, спасл мя еси от низходящих в ров.

⁵Пойте Господеви, преподобнии его, и исповедайте память святыни его:

⁶яко гнев в ярости его, и живот в воли его: вечер водворится плачь, и заутра радость.

⁷Аз же рех во обилии моем: не подвижуся во век.

⁸Господи, волею твоею подаждь доброте моей силу: отвратил же еси лице твое, и бых смущен.

⁹К тебе, Господи, воззову, и к Богу моему помолюся.

¹⁰Кая польза в крови моей, внегда сходити ми во истление? еда исповестся тебе персть? или возвестит истину твою?

¹¹Слыша Господь и помилова мя: Господь бысть помощник мой.

¹²Обратил еси плачь мой в радость мне, растерзал еси вретище мое и препоясал мя еси веселием,

¹³яко да воспоет тебе слава моя, и не умилюся. Господи Боже мой, во век исповемся тебе.