Read Елизаветинская Библия, 1751 Притчи 10 Bible Online

Притчи 10 - Елизаветинская Библия, 1751 bible

Притчи 10

¹Сын премудр веселит отца, сын же безумен печаль матери.

²Не пользуют сокровища беззаконных, правда же избавит от смерти.

³Не убиет гладом Господь душу праведную, живот же нечестивых низвратит.

⁴Нищета мужа смиряет: руце же мужественных обогащаются.

⁵Сын наказан премудр будет, безумный же слугою употребится: спасется от зноя сын разумный, ветротленен же бывает на жатве сын беззаконный.

⁶Благословение Господне на главе праведнаго: уста же нечестивых покрыет плачь безвременный.

⁷Память праведных с похвалами: имя же нечестивых угасает.

⁸Премудр сердцем приимет заповеди: непокровенный же устнама остроптевая запнется.

⁹Иже ходит просто, ходит надеяся: развращая же пути своя, познан будет.

¹⁰Намизаяй оком с лестию собирает мужем печали: обличаяй же со дерзновением миротворит.

¹¹Источник жизни в руце праведнаго: уста же нечестиваго покрыет пагуба.

¹²Ненависть воздвизает распрю: всех же нелюбопрителных покрывает любовь.

¹³Иже от устен произносит премудрость, жезлом биет мужа безсердечна.

¹⁴Премудрии скрыют чувство, уста же продерзаго приближаются сокрушению.

¹⁵Стяжание богатых град тверд, сокрушение же нечестивых нищета.

¹⁶Дела праведных живот творят, плодове же нечестивых грехи.

¹⁷Пути жизни хранит наказание: наказанием же не обличеный заблуждает.

¹⁸Покрывают вражду устне правыя: износящии же укоризну безумнейшии суть.

¹⁹От многословия не избежиши греха: щадя же устне, разумен будеши.

²⁰Сребро разжженое язык праведнаго: сердце же нечестиваго изчезнет.

²¹Устне праведных ведят высокая: безумнии же в скудости скончаваются.

²²Благословение Господне на главе праведнаго, сие обогащает, и не имать приложитися ему печаль в сердцы.

²³Смехом безумный творит злая: премудрость же мужеви раждает разум.

²⁴В погибели нечестивый обносится: желание же праведнаго приятно.

²⁵Преходящей бури, нечестивый изчезает, праведный же уклонився спасается во веки.

²⁶Якоже гроздие зеленое вред зубом и дым очима, тако законопреступление творящым е.

²⁷Страх Господень прилагает дни: лета же нечестивых умалятся.

²⁸Пребывает с праведными веселие, упование же нечестивых погибает.

²⁹Утверждение преподобному страх Господень, сокрушение же творящым злая.

³⁰Праведник во веки не поколеблется: нечестивии же не населят земли.

³¹Уста праведнаго каплют премудрость, язык же неправеднаго погибнет:

³²устне мужей праведных каплют благодати, уста же нечестивых развращаются.