Read Елизаветинская Библия, 1751 Притчи 11 Bible Online

Притчи 11 - Елизаветинская Библия, 1751 bible

Притчи 11

¹Мерила льстивая мерзость пред Господем, вес же праведный приятен ему.

²Идеже аще внидет досаждение, тамо и безчестие: уста же смиренных поучаются премудрости.

³Умираяй праведник остави раскаяние, удобна же бывает и посмеятелна нечестивых погибель.

⁴Совершенство правых наставит их, и поползновение отрицающихся пленит их. Не упользуют имения в день ярости: правда же избавит от смерти.

⁵Правда непорочнаго исправляет пути, нечестие же впадает в неправду.

⁶Правда мужей правых избавит их, безсоветием же уловляются беззаконнии.

⁷Скончавшуся мужу праведну, не погибнет надежда: похвала же нечестивых погибнет.

⁸Праведный от лова убегнет, в негоже место предается нечестивый.

⁹Во устех нечестивых сеть гражданом, чувство же праведных благопоспешно.

¹⁰Во благих праведных исправится град, и в погибели нечестивых радование.

¹¹В благословении правых возвысится град, усты же нечестивых раскопается.

¹²Ругается гражданом лишенный разума, муж же мудр безмолвие водит.

¹³Муж двоязычен открывает советы в сонмищи, верный же духом таит вещы.

¹⁴умже и несть управления, падают аки листвие, спасение же есть во мнозе совете.

¹⁵Лукавый злодействует, егда сочетавается с праведным, ненавидит же гласа утверждения.

¹⁶Жена благодатна возносит мужу славу: престол же безчестия жена ненавидящая правды. Богатства ленивии скудни бывают, крепцыи же утверждаются богатством.

¹⁷Души своей благотворит муж милостивый, погубляет же тело свое немилостивый.

¹⁸Нечестивый творит дела неправедная: семя же праведных мзда истины.

¹⁹Сын праведный раждается в живот: гонение же нечестиваго в смерть.

²⁰Мерзость Господеви путие развращенни, приятни же ему вси непорочнии в путех своих.

²¹В руку руце вложив неправедно, не без муки будет злых: сеяй же правду приимет мзду верну.

²²Якоже усерязь златый в ноздрех свинии, тако жене злоумней лепота.

²³Желание праведных все благое, надежда же нечестивых погибнет.

²⁴Суть, иже своя сеюще, множайшая творят: суть же и собирающе чуждая, умаляются.

²⁵Душа благословенна всякая простая: муж ярый неблагообразен.

²⁶Удержаваяй пшеницу оставит ю языком: продаяй пшеницу скупо, от народа проклят, благословение же Господне на главе подавающаго.

²⁷Творяй благая ищет благодати добры: ищущаго же злая постигнут его.

²⁸Надеяйся на богатство свое, сей падет: заступаяй же праведных, той возсияет.

²⁹Не сматряяй своего дому наследит ветры: поработает же безумный разумному.

³⁰От плода правды древо жизни прозябает: отемлются же безвременно души беззаконных.

³¹Аще праведный едва спасается, нечестивый же и грешный где явится?