Read Елизаветинская Библия, 1751 Притчи 14 Bible Online

Притчи 14 - Елизаветинская Библия, 1751 bible

Притчи 14

¹Мудрыя жены создаша домы: безумная же раскопа рукама своима.

²Ходяй право боится Господа: развращаяй же пути своя обезчестится.

³Из уст безумных жезл досаждения: устне же мудрых хранят я.

⁴Идеже несть волов, ясли чисты: а идеже жита многа, явна волу крепость.

⁵Свидетель верен не лжет: разжизает же ложная свидетель неправеден.

⁶Взыщеши премудрости у злых, и не обрящеши: чувство же у мудрых удобно.

⁷Вся противна (суть) мужеви безумну: оружие же чувствия устне премудры.

⁸Премудрость коварных уразумеет пути их: буйство же безумных в заблуждении.

⁹Домове беззаконных требуют очищения, домове же праведных приятни.

¹⁰Сердце мужа чувственно печаль души его: егда же веселится, не примешается досаждению.

¹¹Домове нечестивых изчезнут, селения же право творящих пребудут.

¹²Есть путь, иже мнится человеком прав быти, последняя же его приходят во дно ада.

¹³Ко веселием не примешавается печаль: последняя же радости в плачь приходят.

¹⁴Путий своих насытится дерзосердый, от размышлений же своих муж благ.

¹⁵Незлобивый веру емлет всякому словеси, коварный же приходит в раскаяние.

¹⁶Премудр убоявся уклонится от зла, безумный же на себе надеявся смешавается со беззаконным.

¹⁷Острояростный без совета творит, муж же мудрый многая терпит.

¹⁸Разделяют безумнии злобу, коварнии же удержат чувство.

¹⁹Поползнутся злии пред благими, и нечестивии послужат пред дверьми праведных.

²⁰Друзие возненавидят другов убогих: друзие же богатых мнози.

²¹Безчестяй убогия согрешает, милуяй же нищыя блажен.

²²Заблуждающии (неправедницы) делают злая, милость же и истину делают благии. Не ведят милости и веры делателие злых: милостыни же и веры у делателей благих.

²³Во всяцем пекущемся есть изюбилие: любосластный же и безпечальный в скудости будет.

²⁴Венец премудрых богатство их, житие же безумных зло.

²⁵Избавит от злых душу свидетель верен, разжизает же лживая лестный.

²⁶Во страсе Господни упование крепости, чадом же своим оставит утверждение (мира).

²⁷Страх Господень источник жизни, творит же укланятися от сети смертныя.

²⁸Во мнозе языце слава царю: во оскудении же людсте сокрушение сильному.

²⁹Долготерпелив муж мног в разуме, малодушный же крепко безумен.

³⁰Кроткий муж сердцу врачь: моль же костем сердце чувственно.

³¹Оклеветаяй убогаго раздражает сотворшаго и, почитаяй же его милует нищаго.

³²Во злобе своей отринется нечестивый: надеяйжеся на Господа своим преподобием праведен.

³³В сердцы блазе мужа почиет премудрость, в сердцы же безумных не познавается.

³⁴Правда возвышает язык: умаляют же племена греси.

³⁵Приятен цареви слуга разумный, своим же благообращением отемлет безчестие.