Read Елизаветинская Библия, 1751 Притчи 15 Bible Online

Притчи 15 - Елизаветинская Библия, 1751 bible

Притчи 15

¹Гнев губит и разумныя: ответ же смирен отвращает ярость, а слово жестоко возвизает гневы.

²Язык мудрых добрая свесть: уста же безумных возвещают злая.

³На всяцем месте очи Господни сматряют злыя же и благия.

⁴Изцеление языка древо жизни: храняй же его исполнится Духа.

⁵Безумный ругается наказанию отчу: храняй же заповеди хитрейший. Во мнозе правде крепость многа: нечестивии же от земли искоренятся.

⁶В домех праведных крепость многа: плоды же нечестивых погибают.

⁷Устне мудрых связуются чувством, сердца же безумных не тверда.

⁸Жертвы нечестивых мерзость Господеви, обеты же правоходящих приятни ему.

⁹Мерзость Господеви путие нечестивых: гонящыя же правду любит.

¹⁰Наказание незлобиваго познавается от мимоходящих: ненавидящии же обличения скончаваются срамно.

¹¹Ад и пагуба явна пред Господем, како не и сердца человеков?

¹²Не возлюбит ненаказанный обличающих его, с мудрыми же не побеседует.

¹³Сердцу веселящуся, лице цветет: в печалех же сущу, сетует.

¹⁴Сердце правое ищет чувства: уста же ненаказанных уразумеют злая.

¹⁵На всяко время очи злых приемлют злая: добрии же безмолвствуют присно.

¹⁶Лучше частица малая со страхом Господним, нежели сокровища велия без боязни.

¹⁷Лучше учреждение от зелий с любовию и благодатию, нежели представление телцев со враждою.

¹⁸Муж ярый устрояет брани, долготерпеливый же и будущую укрощает. Терпеливый муж угасит суды, нечестивый же воздвизает паче.

¹⁹Путие праздных постлани тернием, мужественных же углаждени.

²⁰Сын премудр веселит отца, сын же безумен раздражает матерь свою.

²¹Несмысленнаго стези скудны ума: муж же разумен исправляя ходит.

²²Отлагают помышления не чтущии сонмищ: в сердцах же советных пребывает совет.

²³Не послушает злый его, ниже речет полезно что и добро общему.

²⁴Путие живота помышления разумнаго, да уклонився от ада спасется.

²⁵Домы досадителей разоряет Господь, утверди же предел вдовицы.

²⁶Мерзость Господеви помысл неправедный, чистых же глаголы честны.

²⁷Губит себе мздоимец, ненавидяй же даров приятия спасется: милостынями и верами очищаются греси, страхом же Господним уклоняется всяк от зла.

²⁸Сердца праведных поучаются вере, уста же нечестивых отвещают злая: приятни пред Господем путие мужей праведных, имиже и врази друзие бывают.

²⁹Далече отстоит Бог от нечестивых, молитвы же праведных послушает: лучше малое приятие со правдою, нежели многа жита с неправдою: сердце мужа да мыслит праведная, да от Бога исправятся стопы его.

³⁰Видящее око добрая веселит сердце, слава же благая утучняет кости.

³¹Слушаяй обличений живота посреде премудрых водворится.

³²Иже отметает наказание, ненавидт себе: соблюдаяй же обличения любит свою душу.

³³Страх Господень наказание и премудрость, и начало славы отвещает ей (, предидет же смиренным слава).