Read Елизаветинская Библия, 1751 Притчи 20 Bible Online

Притчи 20 - Елизаветинская Библия, 1751 bible

Притчи 20

¹Невинно вино, укоризненно же пиянство, и всяк пребываяй в нем не будет премудр.

²Не разнствует прещение царево от ярости львовы: раздражаяй же его и примешаяйся ему согрешает в свою душу.

³Слава мужу отвращатися от досаждения: всяк же безумен сими соплетается.

⁴Поносимь ленивый не усрамляется, такожде и заемляй пшеницу в жатву.

⁵Вода глубока совет в сердцы мужа: муж же премудр изчерплет ю.

⁶Велика вещь человек, и драгая муж творяй милость: мужа же верна (велико) дело обрести.

⁷Иже без порока живет в правде, блажены оставит дети своя.

⁸Егда царь праведен на престоле сядет, не противится пред очима его ничтоже лукаво.

⁹Кто похвалится чисто имети сердце? или кто дерзнет рещи чиста себе быти от грехов?

¹⁰Вес велик и мал, и мера сугуба, нечиста пред Господем обоя:

¹¹и творяй я в начинаниих своих запнется: юнота с преподобным, и правый путь его.

¹²Ухо слышит, и око видит: Господня дела обоя.

¹³Не люби клеветати, да не вознесешися: отверзи очи твои и насыщайся хлеба.

¹⁴Зло, зло, речет стяжаваяй, и отшед тогда похвалится.

¹⁵Есть злато и множество камений драгих, сосуд честен устне разумны.

¹⁶Возми ризу его, яко испоручник бысть чуждыя, и за чуждую возми залог от него.

¹⁷Сладок есть человеку хлеб лжи, но потом исполнятся уста его камения.

¹⁸Помышление в совете уготовится, в правлении же творит брань.

¹⁹Открываяй тайну ходит лестию: и прельщающему устнами своими не примешайся.

²⁰Злословящему отца или матерь угаснет светилник, зеницы же очес его узрят тму.

²¹Часть поспешна в начале, в последних не благословится.

²²Не рцы: отмщу врагу: но потерпи Господа, да ти поможет.

²³Мерзость Господеви сугубый вес, и мерило лживо не добро пред ним.

²⁴От Господа исправляются стопы мужу: смертный же како уразумеет пути своя?

²⁵Сеть мужеви скоро нечто от своих освящати: по обете бо раскаяние бывает.

²⁶Веятель нечестивых есть царь мудр и наложит на ня коло.

²⁷Свет Господень дыхание человеком, иже испытает тайная утробы.

²⁸Милостыня и истина сохранение царю, и оыдут престол его в правде.

²⁹Лепота (есть) юным премудрость: слава же старым седины.

³⁰Раны и сокрушения сретают злых, язвы же в сокровищих чрева.