Read Елизаветинская Библия, 1751 Притчи 25 Bible Online

Притчи 25 - Елизаветинская Библия, 1751 bible

Притчи 25

¹Сия притчи соломони бывшыя нерасположенны, яже списаша друзие езекии царя иудейска.

²Слава Божия крыет слово, слава же цурева почитает повеления его.

³Небо высоко, земля же глубока: сердце же царево необличително.

⁴Куй неискушенное сребро, и очистится чисто все.

⁵Убивай нечестивыя от лица царева, и исправится в правде престол его.

⁶Не гордися пред лицем царевым и на месте сильных не стани:

⁷лучше бо ти есть, егда речет: взыди ко мне: нежели смиритися тебе пред лицем сильнаго.

⁸Иже видеста очи твои, глаголи. Не впадай в тяжбу скоро, да не раскаешися послежди, егда тебе досадит друг твой.

⁹Вступай вспять, не неради, да не поносит убо тебе друг:

¹⁰свара же твоя и вражда твоя не отступит, но будет ти равна со смертию. Благодать и любы свобождает, в нихже утверди себе, да не в поношении будеши, но сохрани пути твоя добре устроены.

¹¹(Якоже) яблоко злато во усерязи сардийскаго камене, сице рещи слово при приличных ему.

¹²И (якоже) во усерязь златый сардийский камень многоценный вяжется, (сице) слово премудро во ухо благопослушно.

¹³Якоже исходище снега в жатву зноя пользует, тако вестник верен пославших его: душы бо употребляющих его пользует.

¹⁴Якоже ветри и облацы и дождеве являющиися, тако и хвалящийся о даянии ложнем.

¹⁵В долготерпении благополучие царем: язык же мякок сокрушает кости.

¹⁶Мед обрет яждь умеренно, да не како пресыщен изблюеши.

¹⁷Не учащай вносити ногу твою ко другу твоему, да не когда насыщься тебе, возненавидит тя.

¹⁸Дреколь и мечь и стрела остра, тако и муж свидетелствуяй на друга своего свидетелство ложное.

¹⁹Путь злаго и нога законопреступнаго погибнут в день зол.

²⁰Якоже оцет неполезен вреду и дым очима, тако припадшая страсть в телеси сердце оскорбляет.

²¹Якоже молие в ризе и червие в древе, тако печаль мужу вредит сердце.

²²Аще алчет враг твой, ухлеби его: аще ли жаждет, напой его:

²³сие бо творя, углие огненное собираеши на главу его, Господь же воздаст тебе благая.

²⁴Ветр северный воздвизает облаки, лице же безстудно язык раздражает.

²⁵Лучше жити во угле непокрытем, неже во храмине общей со женою клеветливою.

²⁶Якоже вода студеная души жаждущей благоприятна, тако весть благая от земли издалеча.

²⁷Якоже аще кто источник заграждает и исходище воды губит, тако не лепо праведнику пасти пред нечестивым.

²⁸Ясти мед много не добро: почитати же подобает словеса славна.

²⁹Якоже град стенами разорен и не огражден, тако муж творяй что без совета.