Read Елизаветинская Библия, 1751 Притчи 26 Bible Online

Притчи 26 - Елизаветинская Библия, 1751 bible

Притчи 26

¹Якоже роса в жатву и якоже дождь в лете, тако несть безумному чести.

²Якоже птицы отлетают и врабиеве, тако клятва суетная не найдет ни на когоже.

³Якоже бичь коню и остен ослу, тако жезл языку законопреступну.

⁴Не отвещай безумному по безумию его, да не подобен ему будеши:

⁵но отвещай безумному по безумию его, да не явится мудр у себе.

⁶От путий своих поношение творит, иже посла вестником безумным слово.

⁷Отими шествие от глезн и законопреступление от уст безумных.

⁸Иже привязует камень в пращи, подобен есть дающему безумному славу.

⁹Терния прозябают в руце пияницы, и порабощение в руце безумных.

¹⁰Многими волнуется всяка плоть безумных, сокрушается бо изступление их.

¹¹Якоже пес, егда возвратится на своя блевотины, и мерзок бывает, тако безумный своею злобою возвращься на свой грех. Есть стыд наводяй грех, и есть стыд слава и благодать.

¹²Видех мужа непщевавша себе мудра быти, упование же имать безумный паче его.

¹³Глаголет ленивый послан на путь: лев на путех, на стогнах же разбойницы.

¹⁴Якоже дверь обращается на пяте, тако ленивый на ложи своем.

¹⁵Скрыв ленивый руку в недро свое не возможет принести ко устом.

¹⁶Мудрейший себе ленивый является, паче во изюбилии износящаго весть.

¹⁷Якоже держай за ошиб пса, тако председателствуяй чуждему суду.

¹⁸Якоже врачуемии мещут словеса на человеки, сретаяй же словом первый запнется:

¹⁹тако вси коварствующии над своими други: егда же увидени будут, глаголют, яко играя содеях.

²⁰Во мнозех древех растет огнь: а идеже несть разгневляюща, умолкает свар.

²¹Огнище углию, и дрова огневи: муж же клеветлив в мятеж свара.

²²Словеса ласкателей мягка: сия же ударяют в сокровища утроб.

²³Сребро даемо с лестию, якоже скудель вменяемо: устне гладки сердце покрывают прискорбно.

²⁴Устнама вся обещавает плачай враг, в сердцы же содевает лесть.

²⁵Аще тя молит враг велиим гласом, не веруй ему, седмь бо есть лукавствий в души его.

²⁶Таяй вражду составляет лесть: открывает же своя грехи благоразумный на сонмищих.

²⁷Изрываяй яму искреннему впадется в ню: валяяй же камень на себе валит.

²⁸Язык лжив ненавидит истины, уста же непокровенна творят нестроение.