Read Елизаветинская Библия, 1751 Притчи 27 Bible Online

Притчи 27 - Елизаветинская Библия, 1751 bible

Притчи 27

¹Не хвалися о утрии, не веси бо, что родит (день) находяй.

²Да хвалит тя искренний, а не твоя уста, чуждий, а не твои устне.

³Тяжко камень и неудобоносно песок, гнев же безумнаго тяжший обоего.

⁴Безмилостивна ярость и остр гнев, но ничтоже постоит ревности.

⁵Лучше обличения откровенна тайныя любве.

⁶Достовернее суть язвы друга, нежели вольная лобзания врага.

⁷Душа в сытости сущи сотам ругается: души же нищетней и горькая сладка являются.

⁸Якоже егда птица отлетит от гнезда своего, тако человек порабощается, егда устранится от своих мест.

⁹Миры и вином и фимиамы красуется сердце, растерзаваетжеся от бед душа.

¹⁰Друга твоего или друга отча не оставляй: в дом же брата своего не вниди неблагополучно: лучше друг близ, неже брат далече живый.

¹¹Мудр буди, сыне, да веселится сердце твое, и отврати от себе понослива словеса.

¹²Хитрый злым находящым укрывается: безумнии же нашедше тщету постраждут.

¹³Отими ризу его, прейде бо досадитель, иже чуждая погубляет.

¹⁴Иже аще благословит друга утро велиим гласом, от кленущаго ни чимже разнствовати возмнится.

¹⁵Капли изгоняют человека в день зимен из дому его, тако и жена клеветливая из своего дому.

¹⁶Север жесток ветр, именем же приятен нарицается.

¹⁷Железо железа острит: муж же поощряет лице дружне.

¹⁸Иже насаждает смоковницу, снесть плоды ея: а иже хранит господа своего, честен будет.

¹⁹Якоже суть неподобна лица лицам, сице ниже сердца человеков.

²⁰Ад и погибель не насыщаются: такожде и очи человечестии несыти. Мерзость Господеви утверждаяй очи, и ненаказаннии невоздержни языком.

²¹Искушение сребру и злату раздежение: муж же искушается усты хвалящих его. Сердце беззаконника взыскует злая, сердце же право взыскует разума.

²²Аще биеши безумнаго посреде сонмища срамляя его, не отимеши безумия его.

²³Разумне разумевай души стада твоего, и да приставиши сердце твое ко твоим стадам.

²⁴Яко не во век мужеви держава и крепость, ниже предает от рода в род.

²⁵Прилежи о злацех сущих на поли и пожнеши траву, и собирай сено нагорное,

²⁶да имаши овцы на одеяние: почитай поле, да будут ти агнцы.

²⁷Сыне, от мене имаши речения крепка в жизнь твою и в жизнь твоих служителей.