Read Елизаветинская Библия, 1751 Притчи 3 Bible Online

Притчи 3 - Елизаветинская Библия, 1751 bible

Притчи 3

¹Сыне, моих законов не забывай, глаголы же моя да соблюдает твое сердце:

²долготу бо жития и лета жизни и мир приложат тебе.

³Милостыни и вера да не оскудевают тебе: обложи же я на твоей выи и напиши я на скрижали сердца твоего: и обрящеши благодать.

⁴И промышляй добрая пред Господем (Богом) и человеки.

⁵Буди уповая всем сердцем на Бога, о твоей же премудрости не возносися:

⁶во всех путех твоих познавай ю, да исправляет пути твоя.

⁷Не буди мудр о себе: бойся же Бога и уклоняйся от всякаго зла:

⁸тогда изцеление будет телу твоему и уврачевание костем твоим.

⁹Чти Господа от праведных твоих трудов и начатки давай ему от твоих плодов правды:

¹⁰да исполнятся житницы твоя множеством пшеницы, вино же точила твоя да источают.

¹¹Сыне, не пренебрегай наказания Господня, ниже ослабевай от него обличаемь:

¹²егоже бо любит Господь, наказует, биет же всякаго сына, егоже приемлет.

¹³Блажен человек, иже обрете премудрость, и смертен, иже уведе разум.

¹⁴Лучше бо сию куповати, нежели злата и сребра сокровища:

¹⁵честнейша же есть камений многоценных: не сопротивляется ей ничтоже лукаво, благознатна есть всем приближающымся ей: всяко же честное недостойно ея есть.

¹⁶Долгота бо жития и лета жизни в деснице ея, в шуйце же ея богатство и слава: от уст ея исходит правда, закон же и милость на языце носит.

¹⁷Путие ея путие добри, и вся стези ея мирны.

¹⁸Древо живота есть всем держащымся ея, и воскланяющымся на ню, яко на Господа, тверда.

¹⁹Бог премудростию основа землю, уготова же небеса разумом:

²⁰в чувстве его бездны разверзошася, облацы же источиша росу.

²¹Сыне, да не преминеши, соблюди же мой совет и мысль:

²²да жива будет душа твоя, и благодать будет на твоей выи: (будет же изцеление плотем твоим и уврачевание костем твоим:)

²³да ходиши надеяся в мире во всех путех твоих, нога же твоя не поткнется.

²⁴Аще бо сядеши, безбоязнен будеши, аще же поспиши, сладостно поспиши.

²⁵И не убоишися страха нашедшаго, ниже устремления нечестивых находящаго:

²⁶Господь бо будет на всех путех твоих и утвердит ногу твою, да не поползнешися.

²⁷Не отрецыся благотворити требующему, егда имать рука твоя помогати.

²⁸Не рцы: отшед возвратися, и заутра дам, сильну ти сущу благотворити: не веси бо, что породит день находяй.

²⁹Не соплетай на друга твоего зла, пришелца суща и уповающа на тя.

³⁰Не враждуй на человека туне, да не что на тя содеет злое.

³¹Не стяжи злых мужей поношения, ни возревнуй путем их.

³²Нечист бо пред Господем всяк законопреступник и с праведными не сочетавается.

³³Клятва Господня в домех нечестивых, дворы же праведных благословляются.

³⁴Господь гордым противится, смиренным же дает благодать.

³⁵Славу премудрии наследят, нечестивии же вознесоша безчестие.