Read Елизаветинская Библия, 1751 Притчи 30 Bible Online

Притчи 30 - Елизаветинская Библия, 1751 bible

Притчи 30

¹Сия глаголет муж верующым Богови, и почиваю:

²безумнее бо есмь от всех человек, и разума человеческаго несть во мне:

³Бог же научи мя премудрости, и разум святых уразумех.

⁴Кто взыде на небо и сниде? кто собра ветры в недра? кто возврати воду в ризу? кто обдержа вся концы земли? кое имя его? или кое имя сыну его, да разумееши?

⁵Вся бо словеса Божия раздежена: защищает же сам благоговеющих ему.

⁶Не приложи ко словесем его, да не обличит тя, и ложь будеши.

⁷Двое прошу у тебе: не отими от мене благодати прежде умертвия моего:

⁸суетно слово и ложно далече от мене сотвори, богатства же и нищеты не даждь ми: устрой же ми потребная и самодоволная,

⁹да не насыщься ложь буду и реку: кто мя видит? или обнищав украду и кленуся именем Божиим.

¹⁰Не предаждь раба в руце господина, да не когда прокленет тя, и изчезнеши.

¹¹Чадо зло кленет отца и матерь не благословит.

¹²Чадо зло праведна себе судит, исхода же своего не измы.

¹³Чадо зло высоки очи имать, веждома же своима возносится.

¹⁴Чадо зло мечь зубы (своя) имать, и членовныя яко сечиво, еже губити и поядати смиренныя от земли и убогия их от человек.

¹⁵Пиявица име три дщери, любовию возлюблены, и три сия не насытишася ея, и четвертая не удовлися рещи: доволно (ми есть).

¹⁶Ад и похоть жены, и земля ненапоеная водою и вода и огнь не рекут: довлеет.

¹⁷Око ругающееся отцу и досаждающее старости матерни, да исторгнут е вранове от дебрия и да снедят е птенцы орли.

¹⁸Трие ми суть невозможная уразумети, и четвертаго не вем:

¹⁹следа орла паряща (по воздуху) и пути змиа (ползуща) по камени, и стези корабля пловуща по морю и путий мужа в юности (его).

²⁰Таков путь жены блудницы: яже егда сотворит, и измывшися, ничтоже, рече, содеях нелепо.

²¹Треми трясется земля, четвертаго же не может понести:

²²аще раб воцарится, и безумный исполнится пищею, и раба аще изженет свою госпожу,

²³и мерзкая жена аще ключится добру мужу.

²⁴Четыри же суть малейшая на земли, сия же суть мудрейша мудрых:

²⁵мравие, имже несть крепости и уготовляют в жатву пищу:

²⁶и хирогрилли, язык не крепок, иже сотвориша в камениих домы своя:

²⁷безцарни суть прузие, и воюют от единаго повеления благочинно:

²⁸ящерица, руками опирающися и удобь уловляема сущи, живет во твердех царевых.

²⁹Трие суть, яже благопоспешно ходят, четвертое же, еже добре проходит:

³⁰скимен львов крепчае зверей, иже не отвращается, ни устрашается скота,

³¹и петель ходя в кокошех благодушен, и козел предводитель стаду, и царь глаголяй к народу во языце.

³²Аще вдаси себе в веселие и простреши руку твою со сваром, поруган будеши.

³³Мельзи млеко, и будет масло. Аще ли ноздри чешеши, изыдет кровь: аще же извлечеши словеса, изыдут судове и тяжбы.