Read Елизаветинская Библия, 1751 Притчи 31 Bible Online

Притчи 31 - Елизаветинская Библия, 1751 bible

Притчи 31

¹Моя словеса рекошася от Бога, царево пророчество, егоже наказа мати его:

²что, чадо, (соблюдеши,) что речение Божие? первородне, тебе глаголю, сыне: что, чадо моего чрева? что, чадо моих молитв?

³Не даждь женам твоего богатства и твоего ума и жития в последний совет.

⁴С советом все твори, с советом пий вино: сильнии гневливи суть, вина да не пиют,

⁵да напившеся не забудут мудрости и право судити немощным не возмогут.

⁶Дадите сикера сущым в печалех и вино пити сущым в болезнех,

⁷да забудут убожества и болезней не воспомянут ктому.

⁸Сыне, отверзай уста твоя слову Божию и суди вся здраво:

⁹отверзай уста твоя и суди праведно, разсуждай же убога и немощна.

¹⁰Жену доблю кто обрящет, дражайши есть камения многоценнаго таковая:

¹¹дерзает на ню сердце мужа ея: таковая добрых корыстей не лишится:

¹²делает бо мужу своему благая во все житие:

¹³обретши волну и лен, сотвори благопотребное рукама своима.

¹⁴Бысть яко корабль куплю дея, издалеча собирает себе богатство:

¹⁵и востает из нощи, и даде брашна дому и дела рабыням.

¹⁶Узревши село купи, от плодов же рук своих насади стяжание.

¹⁷Препоясавши крепко чресла своя, утвердит мышцы своя на дело,

¹⁸и вкуси, яко добро есть делати, и не угасает светилник ея всю нощь.

¹⁹Лакти своя простирает на полезная, руце же свои утверждает на вретено,

²⁰и руце свои отверзает убогому, длань же простре нищу.

²¹Не печется о сущих в дому муж ея, егда где замедлит: вси бо у нея одеяни суть.

²²Сугуба одеяния сотвори мужу своему, от виссона же и порфиры себе одеяния.

²³Славен бывает во вратех муж ея, внегда аще сядет в сонмищи со старейшины жительми земли.

²⁴Плащаницы сотвори и продаде финикианом, опоясания же хананеом.

²⁵Уста своя отверзе внимателно и законно и чин заповеда языку своему.

²⁶Крепостию и лепотою облечеся, и возвеселися во дни последния.

²⁷Тесны стези дому ея, брашна же леностнаго не яде.

²⁸Уста своя отверзе мудро и законно.

²⁹Милостыня же ея возстави чада ея, и обогатишася: и муж ея похвали ю:

³⁰многи дщери стяжаша богатство, многи сотвориша силу: ты же предуспела и превознеслася еси над всеми:

³¹ложнаго угождения и суетныя доброты женския несть в тебе: жена бо разумная благословена есть: страх же Господень сия да хвалит.

³²Дадите ей от плодов устен ея, и да хвалимь будет во вратех муж ея.