Read Елизаветинская Библия, 1751 Екклесиаст 1 Bible Online

Екклесиаст 1 - Елизаветинская Библия, 1751 bible

Екклесиаст 1

¹Глаголы екклесиаста, сына давидова, царя израилева во Иерусалиме.

²Суета суетствий, рече екклесиаст, суета суетствий, всяческая суета.

³Кое изюбилие человеку во всем труде его, имже трудится под солнцем?

⁴Род преходит и род приходит, а земля во век стоит.

⁵И восходит солнце и заходит солнце и в место свое влечется, сие возсиявая тамо.

⁶Идет к югу и обходит к северу, обходит окрест, идет дух и на круги своя обращается дух.

⁷Вси потоцы идут в море, и море несть насыщаемо: на место, аможе потоцы идут, тамо тии возвращаются ити.

⁸Вся словеса трудна, не возможет муж глаголати: и не насытится око зрети, ни исполнится ухо слышания.

⁹Что было, тожде есть, еже будет: и что было сотвореное, тожде имать сотворитися:

¹⁰и ничтоже ново под солнцем. Иже возглаголет и речет: се, сие ново есть: уже бысть в вецех бывших прежде нас.

¹¹Несть память первых, и последним бывшым не будет их память с будущими на последок.

¹²Аз екклесиаст бых царь над израилем во Иерусалиме

¹³и вдах сердце мое, еже взыскати и разсмотрити в мудрости о всех бывающих под небесем: яко попечение лукаво даде Бог сыном человеческим, еже упражднятися в нем.

¹⁴Видех всяческая сотворения сотворенная под солнцем: и се, вся суетство и произволение духа.

¹⁵Развращенное не может исправитися, и лишение не может изчислитися.

¹⁶Глаголах аз в сердцы моем, еже рещи: се, аз возвеличихся и умножих мудрость паче всех, иже быша прежде мене во Иерусалиме,

¹⁷и сердце мое вдах, еже ведети премудрость и разум: и сердце мое виде многая, премудрость и разум, притчи и хитрость: уразумех аз, яко и сие есть произволение духа:

¹⁸яко во множестве мудрости множество разума, и приложивый разум приложит болезнь.