Read Елизаветинская Библия, 1751 Екклесиаст 11 Bible Online

Екклесиаст 11 - Елизаветинская Библия, 1751 bible

Екклесиаст 11

¹Посли хлеб твой на лице воды, яко во множестве дний обрящеши его.

²Даждь часть седмим и осмим, яко не веси, что будет лукаво на земли.

³Аще исполнятся облацы дождя, на землю изливают: и аще падет древо на юг, и аще на север, на месте, идеже падет древо, тамо будет.

⁴Блюдый ветра не сеет, и сматряяй во облацех не пожнет.

⁵В нихже несть ведый, кии путь духа, якоже кости во чреве раждающия: тако не уразумееши дел Божиих, елика сотворит всяческая.

⁶В заутрии сей семя твое, и в вечер да не оставляет рука твоя: яко не веси, кое произыдет сие или оно, и аще обоя вкупе благая.

⁷И сладко свет, и благо очима зрети солнце:

⁸яко аще и многа лета поживет человек, и о всех сих возвеселится, и помянет дни тмы, яко мнози будут: все грядущее суета.

⁹Веселися, юноше, во юности твоей, и да ублажит тя сердце твое во днех юности твоея, и ходи в путех сердца твоего непорочен и не в видении очию твоею: и разумей, яко о всех сих приведет тя Бог на суд:

¹⁰и отстави ярость от сердца твоего, и отрини лукавство от плоти твоея: яко юность и безумие суета.