Read Елизаветинская Библия, 1751 Песня Песней 7 Bible Online

Песня Песней 7 - Елизаветинская Библия, 1751 bible

Песня Песней 7

¹Что увидите у суламитины? приходящая яко лики полков, что украсишася стопы твоя во обутиих твоих, дщи надавля? чины бедру твоею подобни усеряземь, делу рук художника:

²пуп твой чаша источена, не лишаемая мста: чрево твое яко стог пшеницы, огражден в кринах:

³два сосца твоя, яко два млада близнецы серны:

⁴выя твоя яко столп слоновый: очи твои яко езера во есевоне, во вратах дщерей многих: нос твой яко столп ливанский, сматряяй лице дамаска:

⁵глава твоя на тебе яко кармил (гора), и заплетение главы твоея яко багряница, царь увязан в преристаниих.

⁶Что украсилася еси, и что усладилася еси, любы, во сладостех твоих?

⁷Сие величество твое: уподобилася еси финику, и сосца твоя грезном.

⁸Рекох: взыду на финик, удержу высоту его: и будут сосцы твои яко грезнове винограда, и воня ноздрей твоих яко яблока:

⁹и гортань твой яко вино благо, ходящее брату моему в правость, доволно устнам моим и зубом.

¹⁰Аз брату моему, и ко мне обращение его.

¹¹Прииди, брате мой, и взыдем на село, водворимся в селех:

¹²ураним в винограды, увидим аще процвете виноград, процветоша ли овощие, процветоша ли яблока? тамо дам тебе сосца моя.

¹³Мандрагоры даша воню, и при дверех наших вси плоды новии: до ветхих, брате мой, соблюдох ти.