Read Елизаветинская Библия, 1751 Песня Песней 8 Bible Online

Песня Песней 8 - Елизаветинская Библия, 1751 bible

Песня Песней 8

¹Кто даст тя, брате мой, ссуща сосцы матере моея? обретши тя вне целую тя, и ктому не уничижат мене.

²Пойму тя, введу тя в дом матере моея и в ложницу заченшия мя: тамо мя научиши: напою тя от вина с вонями строенаго, от воды яблок моих.

³Шуйца его под главою моею, и десница его оымет мя.

⁴Заклях вас, дщери Иерусалимския, в силах и в крепостех селных: аще подвижете и воздвижете любовь, дондеже аще восхощет.

⁵Кто сия восходящая убелена и утвержаема о брате своем? под яблонею возбудих тя: тамо роди тя мати твоя, тамо поболе тобою рождшая тя.

⁶Положи мя яко печать на сердцы твоем, яко печать на мышце твоей: зане крепка яко смерть любы, жестока яко ад ревность: крила ея крила огня, (углие огненно) пламы ея.

⁷Вода многа не может угасити любве, и реки не потопят ея. Аще даст муж все имение свое за любовь, уничижением уничижат его.

⁸Сестра наша мала и сосцу не имать: что сотворим сестре нашей в день, в оньже аще глаголатися будет ей?

⁹Аще стена есть, соградим на ней забрала сребряна: и аще дверь есть, напишем на ней дску кедрову.

¹⁰Аз стена, и сосцы мои яко столпи: аз бех во очию их аки обретающая мир.

¹¹Виноград бысть соломону во вееламоне: даде виноград свой стрегущым: муж принесет в плоде его тысящу сребреник.

¹²Виноград мой предо мною: тысяща соломону и двести стрегущым плод его.

¹³Седяй в вертоградех, и друзие внемлющии гласу твоему: глас твой внуши мне.

¹⁴Бежи, брате мой, и уподобися серне или юнцу еленей, на горы ароматов.