Read Елизаветинская Библия, 1751 Премудрость Соломона 1 Bible Online

Премудрость Соломона 1 - Елизаветинская Библия, 1751 bible

Премудрость Соломона 1

¹Возлюбите правду, судящии землю: мудрствуйте о Господе в благостыни и в простоте сердца взыщите его:

²яко обретается не искушающым его, является же не неверующым ему.

³Строптивая бо помышления отлучают от Бога: искушаемая сила обличает безумных.

⁴Яко в злохудожну душу не внидет премудрость, ниже обитает в телеси повиннем греху:

⁵святый бо дух наказания отбежит льстива и отимется от помышлений неразумных и обличится от находящия неправды.

⁶Человеколюбив бо дух премудрости и не обезвинит хульника от устен его: яко внутренних его свидетель есть Бог и сердца его испытатель истинен и языка слышатель:

⁷яко дух Господень исполни вселенную, и содержай вся разум имать гласа.

⁸Сего ради вещаяй неправедная никтоже утаится, и не мимо идет его обличающь суд.

⁹В советех бо нечестиваго истязание будет, словес же его слышание ко Господу приидет во обличение беззаконий его:

¹⁰яко ухо рвения слышит вся, и молва роптаний не крыется.

¹¹Хранитеся убо от роптания неполезна и от оболгания щадите язык: яко вещание тайное тще не прейдет, уста же лжущая убивают душу.

¹²Не вожделейте смерти в заблуждении живота вашего, ниже привлекайте погибели делами рук ваших:

¹³яко Бог смерти не сотвори, ни веселится о погибели живых.

¹⁴Созда бо во еже быти всем, и спасителны бытия мира, ни бо есть в них врачевания губителнаго, ниже аду царствия на земли.

¹⁵Правда бо безсмертна есть: (неправда же смерти снабдение:)

¹⁶нечестивии же рукама и словесы призваша ю, другиню вмениша ю и истаяша, и завет положиша с нею, яко достойни суть оноя части быти.