Read Елизаветинская Библия, 1751 Премудрость Соломона 10 Bible Online

Премудрость Соломона 10 - Елизаветинская Библия, 1751 bible

Премудрость Соломона 10

¹Сия первозданнаго отца миру единаго созданнаго сохрани и изведе его от греха его,

²даде же ему крепость содержати всяческая.

³Отступив же от нея неправедный во гневе своем со братоубийственными погибе яростьми:

⁴егоже ради потопляему землю паки спасе премудрость, малым древом праведника соблюдши.

⁵Сия и во единомыслии лукавства смешеных языков обрете праведника и сохрани его непорочна Богу, и в поболении о чаде крепка соблюде.

⁶Сия праведнаго, погибающым нечестивым, избави бежащаго от огня низходяща на пять градов:

⁷ихже еще свидетелство лукавствия дымящаяся стоит земля пуста, и несовершенными времены плодоносящая древеса, и неверныя души память стоящь столп слан.

⁸Премудрость бо мимоходящии не токмо повредишася, еже не ведети блага, но и безумия своего оставиша житию память, да в нихже согрешиша, ниже утаитися возмогут.

⁹Премудрость же служащих ей от болезней избави.

¹⁰Сия бежащаго от гнева братня праведника настави на стези правы и показа ему Царствие Божие и даде ему разум святых, почте его в трудех и умножи труды его.

¹¹Во обиде обдержащих его предста ему и обогати его,

¹²сохрани его от враг, и от наветующих защити его, и подвиг крепок на победу даде ему, да увесть, яко всех сильнее есть благочестие.

¹³Сия проданаго праведника не остави, но от греха избави его: сниде с ним в ров,

¹⁴и во узах не остави его, дондеже принесе ему скиптр царствия и власть на мучащих его: лживых же показа, порок сотворших нань, и даде ему славу вечную.

¹⁵Сия людей преподобных и семя непорочное избави от язык оскорбляющих:

¹⁶вниде в душу раба Господня и воста противу царей страшных в чудесех и знамениих.

¹⁷Воздаде преподобным мзду трудов их, настави их в путь дивен и бысть им в покров днем и в пламень звезд в нощи.

¹⁸Преведе их но морю чермному и проведе их сквозе воду многу:

¹⁹враги же их потопи и из глубины бездны изрину их.

²⁰Сего ради праведнии взяша корысти нечестивых и воспеша, Господи, имя святое твое, и одолетелницу руку твою похвалиша единодушне:

²¹яко премудрость отверзе уста немых и языки младенцем сотвори ясны.