Read Елизаветинская Библия, 1751 Премудрость Соломона 14 Bible Online

Премудрость Соломона 14 - Елизаветинская Библия, 1751 bible

Премудрость Соломона 14

¹Плыти паки кто помыслив и сверепыя волны преходити, носящаго его корабля тленнейшее древо призывает:

²оное бо желание пристяжаний умысли, хитрец же мудростию содела:

³твой же, Отче, устрояет промысл: яко дал еси и в мори путь и в волнах стезю крепкую,

⁴показуя, яко силен еси от всякаго спасти, аще и без художества кто взыдет.

⁵Хощеши же, да не будут праздна дела премудрости твоея: сего ради и малейшему древу вверяют человецы душы (своя), и преходяще волны кораблецем избавлени суть.

⁶И от начала бо, егда погибаху гордии исполини, упование мира в кораблеце избежавшее, остави веку семя рождения, рукою твоею устроено.

⁷Благословено бо древо, имже бывает правда.

⁸Рукотворенное же проклято есть, и сотворивый е: яко ов убо содела, сие же тленное богом именовася.

⁹В равне бо ненавидима суть Богу и нечествуяй, и нечестие его:

¹⁰ибо сотвореное с сотворшим мучимо будет.

¹¹Сего ради и во идолех языческих будет казнь, яко в создании Божии в мерзость сотворени суть и в соблазны душам человеческим и в сеть ногам буих.

¹²Начало бо блужения умышление идолов: изобретение же их тление живота.

¹³Ниже бо быша от начала, ниже будут во веки:

¹⁴тщеславием бо человеческим внидоша в мир, и сего ради краток их конец вменися.

¹⁵Горьким бо плачем сетуя отец скоро восхищенаго чада образ сотворив, егоже тогда человека мертва, ныне яко бога почте: и предаде подручным тайны и жертвы:

¹⁶потом временем возмогший нечестивый обычай, аки закон хранимь бысть, и мучителей повелением почитаема бяху изваянная:

¹⁷ихже в лице не могуще чествовати человецы дальнаго ради обитания, издалеча лице изобразивше, явный образ почитаемаго царя сотвориша, яко да отстоящаго аки близ сущаго ласкают со прилежанием.

¹⁸В продолжение же злочестия и не разумеющих принуди художниково любочестие.

¹⁹Сей бо хотя угодити державствующему, произведе хитростию (своею) подобие на лучшее:

²⁰множество же человек, привлечено благообразием дела, прежде вмале чествованаго человека ныне в бога вмениша.

²¹И сие бысть житию в прельщение, яко или злоключению, или мучителству послуживше человецы, несообщно имя камению и древам обложиша.

²²Посем не доволно бе прельщатися о Божии разуме, но и в велицей живуще безумия брани, толикая злая мир именуют.

²³Ибо или детоубийственныя жертвы, или сокровенныя тайны, или неистовныя от иных законов пиршества творяше,

²⁴ниже жития, ниже браков чистых еще хранят: един же другаго или наветом убивает, или блудя оскорбляет.

²⁵Вся же смешена суть, кровь и убийство, татьба и лесть, растление, неверство, смятение, заклинание, молва благих,

²⁶благодати забвение, душам осквернение, рождению пременение, браков безчиние, прелюбодеяние и студодеяние.

²⁷Недостойных бо имене идолов служение начало всякаго зла, и вина и конец есть:

²⁸ибо или веселящеся неистовствуют, или пророчествуют ложная, или живут неправедне, или кленутся скоро.

²⁹На бездушныя бо идолы надеющеся, зле кленущеся казними быти не чают.

³⁰За обоя же на них приидет суд: понеже зле мудрствоваша о Бозе, внемлюще идолом, и неправедно кляшася лестию, презревше преподобие.

³¹Не бо сила кленущих, но согрешающым суд находит всегда на преступление неправедных.