Read Елизаветинская Библия, 1751 Премудрость Соломона 16 Bible Online

Премудрость Соломона 16 - Елизаветинская Библия, 1751 bible

Премудрость Соломона 16

¹Сего ради от подобных пострадаша достойне, и множеством зверей казнени быша.

²Вместо мучения благо сотворил еси людем твоим, в похотение желания странное вкушение, пищу уготовал еси крастели,

³да они убо вожделевшии пищи, показанием посланых, и от нужнаго хотения отвратятся, сии же вмале скудни бывше, и странна приобщатся вкушения.

⁴Подобаше бо на оных убо неизбежней нищете наити мучителствующих, сим же токмо показати, како врази их мучишася.

⁵Ибо егда тем найде жесток зверей гнев, и угрызеньми сверепых истребляхуся змиев,

⁶но не до конца пребысть гнев твой: в наказание же вмале смущени быша, знамение имеюще спасения, на воспоминание заповеди закона твоего:

⁷обративыйся бо не (вещию) зримою целяшеся, но тобою всех спасителем.

⁸И в сем же показал еси врагом нашым, яко ты еси избавляяй от всякаго зла:

⁹тех бо акриды и мухи побиша угрызением, и не обретеся цельба душам их, яко достойни бяху от таковых мучитися.

¹⁰Сынов же твоих ниже ядовитых змиев зубы одолеша: милость бо твоя прихождаше и изцеляше их.

¹¹В память бо словес твоих бяху усечени и скоро изцеляхуся, да не во глубину впадше забвения отлучатся твоего благодеяния:

¹²ниже бо зелие, ниже обязание изцели их, но слово твое, Господи, изцеляющее вся.

¹³Ты бо живота и смерти власть имаши, и низводиши даже до врат ада, и возводиши.

¹⁴Человек же убивает убо злобою своею: изшедшаго же духа не возвратит, ниже паки призывает душу взятую.

¹⁵Твоея же руки избежати невозможно есть:

¹⁶отметающиися бо тебе ведети нечестивии, в крепости мышцы твоея биени быша странными дождьми и градами, и бурями гоними неизбежно, и огнем растаеваеми.

¹⁷Преславное бо, в воде вся угашающей множае действоваше огнь: споборник бо есть мир о праведных.

¹⁸Овогда бо убо укрощашеся пламень, да не сожжет посланных животных на нечестивыя: но сии зряще да ведят, яко от Божия суда страждут гонение.

¹⁹Овогда же и между водою выше силы огненныя паляше, да беззаконныя земли порождения растлит.

²⁰Вместо же сих ангелскою пищею питал еси люди твоя, и уготован хлеб с небесе послал еси им без труда, всякое услаждение в себе имеющь и ко всякому сличный вкушению.

²¹Существо бо твое сладость твою ко сыном показоваше, и угождая единаго коегождо воли, якоже кто хотяше, превращашеся.

²²Снег же и лед терпяху огнь и не растаяваху: да уведят, яко плоды врагов истребляше огнь горящь во граде и в дождех блистающь:

²³тойже паки, да питаются праведнии, (огнь) и свою забы силу.

²⁴Творение бо, тебе творцу всех служащее, распростирается на муку противу неправедных и легчае творится во благодеяние ради на тя надеющихя.

²⁵Сего ради и тогда во вся преобразуемое всех кормителнице благодати твоей служаше к воли требующих:

²⁶да научатся сынове твои, ихже возлюбил еси, Господи, яко не рождения плодов питают человека, но слово твое тебе верующих соблюдает.

²⁷Еже бо огнем нерастлено скоро от малыя лучи солнечныя греемое растаявашеся:

²⁸да знаемо будет (всем), яко подобает предварити солнце на благодарение тебе и к востоку света тебе поклонитися.

²⁹Неблагодарнаго бо упование яко зимный иней растает, и излиется яко вода неключима.