Read Елизаветинская Библия, 1751 Премудрость Соломона 2 Bible Online

Премудрость Соломона 2 - Елизаветинская Библия, 1751 bible

Премудрость Соломона 2

¹Рекоша бо в себе помышляющии неправо: мал есть и печален живот наш, и несть изцеления в кончине человечесте, и несть познан возвративыйся от ада.

²Яко самослучайно рождени есмы, и по сем будем якоже не бывше: понеже дым дыхание в ноздрех наших, и слово искра в движении сердца нашего:

³ейже угасшей пепел будет тело, и дух наш разлиется яко мягкий воздух,

⁴и имя наше забвено будет во время, и никтоже воспомянет дел наших: и прейдет живот наш яко следы облака, и яко мгла разрушится, разгнаная от лучь солнечных и теплотою его отягчившися.

⁵Стени бо преход житие наше, и несть возвращения кончины нашея: яко запечатана есть, и никто возвращается.

⁶Приидите убо и насладимся настоящих благих, и употребим создания, яко в юности скоро:

⁷вина дражайшаго и мира (благовонна) исполнимся, и да не прейдет нас цвет жития:

⁸увенчаим нас шипковыми цветы, прежде неже увянут:

⁹ни един от нас лишен да будет нашего наслаждения, везде оставим знамение веселия, яко сия часть наша и жребий сей.

¹⁰Насилие сотворим убогу праведному, не пощадим вдовицы, ниже старца устыдимся седин многолетных.

¹¹Да будет же нам крепость закон правды: некрепкое бо неполезно обретается.

¹²Уловим же (лестию) праведнаго, яко непотребен нам есть и противится делом нашым, и поносит нам грехи закона и злославит нам грехи учения нашего:

¹³возвещает нам разум имети Божий, и отрока Господня себе именует:

¹⁴бысть нам на обличение помышлений наших:

¹⁵тяжек есть нам и к видению, яко неподобно (есть) иным житие его, и отменны (суть) стези его:

¹⁶в поругание вменихомся ему, и удаляетеся от путий наших яко от нечистот: блажит последняя праведных и славится Отца имети (себе) Бога.

¹⁷Увидим, аще словеса его истинна, и искусим яже сбудутся ему.

¹⁸Аще бо есть истинный сын Божий, защитит его и избавит его от руки противящихся.

¹⁹Досаждением и мукою истяжим его, да увемы кротость его и искусим беззлобство его:

²⁰смертию поносною осудим его, будет бо ему разсмотрение от словес его.

²¹Сия помыслиша и прельстишася: ослепи бо их злоба их,

²²и не уведеша таин Божиих, ниже мзды уповаша преподобия, ниже присудиша чести душам непорочным.

²³Яко Бог созда человека в неистление и во образ подобия своего сотвори его:

²⁴завистию же диаволею смерть вниде в мир: вкушают же ю, иже от ея части суть.