Read Елизаветинская Библия, 1751 Премудрость Соломона 3 Bible Online

Премудрость Соломона 3 - Елизаветинская Библия, 1751 bible

Премудрость Соломона 3

¹Праведных не души в руце Божией, и не прикоснется их мука.

²Непщевани быша во очию безумных умрети, и вменися озлобление исход их,

³и еже от нас шествие сокрушение: они же суть в мире.

⁴Ибо пред лицем человеческим аще и муку приимут, упование их безсмертия исполнено:

⁵и вмале наказани бывше, великими благодетелствовани будут, яко Бог искуси их и обрете их достойны себе:

⁶яко злато в горниле искуси их, и яко всеплодие жертвенное прият я.

⁷И во время посещения их возсияют, и яко искры по стеблию потекут:

⁸судят языком и обладают людьми, и воцарится в них Господь во веки.

⁹Надеющиися нань уразумеют истину, и вернии в любви пребудут ему, яко благодать и милость в преподобных его и посещение во избранных его.

¹⁰Нечестивии же, яко помыслиша, приимут запрещение, иже нерадившии о праведнем и от Господа отступивше.

¹¹Премудрость бо и наказание уничижаяй окаянен, и праздно упование их, и труды безплодны, и неключима дела их:

¹²жены их безумны и лукава чада их, проклято рождение их.

¹³Яко блажена есть неплоды неоскверненая, яже не позна ложа во гресе, имети будет плод в посещении душ:

¹⁴и евнух, иже не содела в руку (своею) беззакония, ниже помысли на Господа лукавая, дастся бо ему веры благодать избранна и жребий во храме Господни угоднейший.

¹⁵Благих бо трудов плод благославен, и не отпадающь корень разума.

¹⁶Чада же прелюбодеев несовершена будут, и от законопреступнаго ложа семя изчезнет:

¹⁷аще бо долгоживотни будут, ни во чтоже вменятся, и безчестна на последок старость их:

¹⁸аще же скоро скончаются, не будут имети упования, ниже в день суда утешения:

¹⁹рода бо неправеднаго лютая окончания.