Read Елизаветинская Библия, 1751 Премудрость Соломона 4 Bible Online

Премудрость Соломона 4 - Елизаветинская Библия, 1751 bible

Премудрость Соломона 4

¹Лучше безчадство со добродетелию: безсмертие бо есть в памяти ея, яко и пред Богом познается и пред человеки:

²присущую бо подражают ю и желают отшедшия, и в веце венценосно чтится нескверных подвигов брань одолевши.

³Многоплодно же нечестивых множество неключимо будет, и прелюбодейная насаждения не дадут корения в глубину, ниже крепко стояние сотворят:

⁴аще бо и ветви на время процветут, не крепко возшедше от ветра поколеблются и от зелных ветров искоренятся:

⁵сокрушатся ветви несовершенны, и плод их неключимь, оскомен в снедь, и ни во что потребен.

⁶От беззаконных бо снов чада раждаемая свидетелие суть лукавствия на родители во испытании их.

⁷Праведник же аще постигнет скончатися, в покои будет:

⁸старость бо честна не многолетна, ниже в числе лет изчитается:

⁹седина же есть мудрость человеком, и возраст старости житие нескверно.

¹⁰Благоугоден Богови быв, возлюблен бысть, и живый посреде грешных преставлен бысть:

¹¹восхищен бысть, да не злоба изменит разум его, или лесть прельстит душу его.

¹²Рачение бо злобы помрачает добрая, и парение похоти пременяет ум незлобив.

¹³Скончався вмале исполни лета долга:

¹⁴угодна бо бе Господеви душа его, сего ради потщася от среды лукавствия:

¹⁵людие же видевше и не разумевше, ниже положше в помышлении таковое, яко благодать и милость в преподобных его и посещение во избранных его.

¹⁶Осудит же праведник умираяй живых нечестивых, и юность скончавшаяся скоро долголетную старость неправеднаго.

¹⁷Узрят бо кончину премудраго и не уразумеют, что усоветова о нем и во что утверди его Господь:

¹⁸узрят и уничижат его, Господь же посмеется им:

¹⁹и будут посем в падение безчестно и во укоризну в мертвых в век: яко расторгнет их безгласны ниц и поколеблет их от оснований, и даже до последних опустеют и будут в болезни, и память их погибнет:

²⁰приидут в помышление грехов своих боязливии, и обличат их противу беззакония их.