Read Елизаветинская Библия, 1751 Премудрость Соломона 7 Bible Online

Премудрость Соломона 7 - Елизаветинская Библия, 1751 bible

Премудрость Соломона 7

¹Есмь бо и аз человек смертен, подобен всем и земнороднаго внук первозданнаго:

²и во чреве матерни изобразихся плоть, в десятомесячнем времени согустився в крови от семене мужеска и услаждения сном сошедшагося.

³И аз рожден восприях общаго аера и на подобострастную землю спадох, первый глас подобный всем испустих плача:

⁴в пеленах воскормлен есмь, и с (великим) прилежанием:

⁵ни един бо царь ино име рождения начало,

⁶един бо вход всем есть в житие, подобен же и исход.

⁷Сего ради помолихся, и дан бысть мне разум: призвах, и прииде на мя дух премудрости.

⁸Предсудих ю паче скиптров и престолов, и богатство ничтоже вмених ко сравнению тоя,

⁹ниже уподобих ея каменю драгоценному, яко все злато пред нею песок малый, и яко брение вменится пред нею сребро:

¹⁰паче здравия и красоты возлюбих ю и предизбрах ю вместо света имети, яко неугасаемо есть блистание ея.

¹¹Приидоша же мне благая вся вкупе с нею и безчислено богатство рукама ея:

¹²и возвеселихся о всех, яко ими обладает премудрость: не ведех же ю родителницу быти сих.

¹³Нелестне научихся, без зависти преподаю и богатства ея не сокрываю:

¹⁴неоскудно бо есть сокровище человеком, еже употребившии к Богу послашася в содружение, дарами от наказания представлени.

¹⁵Мне же даде Бог глаголати по разумению и мнети достойне о подаваемых, яко той и премудрости предводитель есть и премудрых исправитель:

¹⁶в руку бо его и мы и словеса наша, и всякий разум и дел художество.

¹⁷Сей бо даде мне о сущих познание неложное, познати составление мира и действие стихий,

¹⁸начало и конец и средину времен, возвратов премены и изменения времен,

¹⁹лет круги и звезд расположения,

²⁰естество животных и гнев зверей, ветров усилие и помышления человеков, разнство летораслем и силы корений.

²¹И елика суть скрыта и явна, познах: всех бо художница научи мя премудрость.

²²Есть бо в той дух разума свят, единородный, многочастный, тонкий, благодвижный, светлый, нескверный, ясный, невредителный, благолюбивый, остр, невозбранен, благоделателен,

²³человеколюбив, известный, крепкий, безпечальный, всесильный, всевидяй, и сквозе вся проходяй духи разумичныя, чистыя, тончайшыя.

²⁴Всякаго бо движения подвижнейша есть премудрость: достизает же и проницает сквозе всяческая ради (своея) чистоты.

²⁵Пара бо есть силы Божия и излияние вседержителя славы чистое: сего ради ничтоже осквернено на ню нападает.

²⁶Сияние бо есть света присносущнаго и зерцало непорочно Божия действия и образ благостыни его.

²⁷Едина же сущи всяческая может, и пребывающи в себе вся обновляет, и по родом в душы преподобных преходящи, други Божия и пророки устрояет:

²⁸ни когоже бо любит Бог, токмо сего, иже со премудростию пребывает.

²⁹Есть бо сия благолепнее солнца и паче всякаго расположения звезд: свету соравняема обретается первая:

³⁰сего бо преемлет нощь, премудрости же не одолеет злоба.