Read Елизаветинская Библия, 1751 Премудрость Соломона 9 Bible Online

Премудрость Соломона 9 - Елизаветинская Библия, 1751 bible

Премудрость Соломона 9

¹Боже отцев и Господи милости твоея, сотворивый вся словом твоим

²и премудростию твоею устроивый человека, да владеет сотворенными от тебе тварьми,

³и да управляет мир в преподобии и правде, и в правоте души суд да судит:

⁴даждь мне твоим престолом приседящую премудрость и не отрини мене от отрок твоих:

⁵яко аз раб твой и сын рабыни твоея, человек немощен и маловременен и умален в разуме суда и законов.

⁶Аще бо кто будет и совершен в сынех человеческих, отсутствующей твоей премудрости, ни во чтоже вменится.

⁷Ты избрал мя еси царя людем твоим и судию сыном твоим и дщерем,

⁸и рекл ми еси создати храм в горе святей твоей и во граде обитания твоего олтарь, подобием скинии (твоея) святыя, юже предуготовал еси от начала.

⁹И с тобою премудрость ведущая дела твоя и присутствующая тогда, егда мир творил еси, и ведущая, что есть угодно пред очима твоима и что право в заповедех твоих:

¹⁰посли ю с небес святых и от престола славы твоея посли ю: да сущи со мною трудится, и увем, что благоугодно есть пред тобою:

¹¹весть бо она вся и разумеет, и наставит мя в делех моих целомудренне и сохранит мя во славе своей:

¹²и будут приятна дела моя, и разсужду люди твоя праведне, и буду достоин престолов отца моего.

¹³Кто бо от человек познает совет Божий? или кто помыслит, что хощет Бог?

¹⁴Помышления бо смертных боязлива, и погрешителна умышления наша:

¹⁵тело бо тленное отягощает душу, и земное жилище обременяет ум многопопечителен.

¹⁶И едва разумеваем, яже на земли, и яже в руках обретаем со трудом: а яже на небесех, кто изследи?

¹⁷Волю же твою кто позна, аще бы не ты дал еси премудрость и послал еси духа святаго твоего от высоты?

¹⁸И тако исправишася стези сущих на земли, и яже тебе угодна, научишася человецы

¹⁹и премудростию спасошася.