Read Елизаветинская Библия, 1751 Сирах 10 Bible Online

Сирах 10 - Елизаветинская Библия, 1751 bible

Сирах 10

¹Премудр судия наказует люди своя, и владычество разумиваго благочинно будет.

²Якоже судия людий своих, тако и слузи его, и якоже владыка града, тако и вси живущии в нем.

³Царь ненаказаный погубит люди своя: и град населится премудростию сильных.

⁴В руце Господни власть земли, и потребнаго воздвигнет во время на ней.

⁵В руце Господни благое шествие мужа, и на лицы книжника возложит славу свою.

⁶Во всяцей неправде не держи гнева на искренняго и не твори ни коего в делех досаждения.

⁷Возненавидена пред Богом и человеки гордыня и от обоих сотворит неправедная.

⁸Царство от языка в язык преводится, ради неправды и досаждения и имений льстивых.

⁹Почто гордится земля и пепел?

¹⁰Яко в животе извергох утробу его.

¹¹Долгую болезнь отсецает врачь:

¹²и царь днесь, а утро умрет.

¹³Ибо егда умрет человек, наследит гады и звери и червие.

¹⁴Начало гордыни человеку отступление от Господа, и егда от сотворшаго и отвращается сердце его:

¹⁵яко начало греха гордыня, и держай ю изрыгнет скверну.

¹⁶Сего ради обезслави Господь в наведениих зол и низврати их до конца:

¹⁷престолы князей низложи Господь и посади кроткия вместо их,

¹⁸корения языков гордых исторже Господь и насади смиренныя вместо их,

¹⁹страны языков низврати Господь и погуби их до основания земли,

²⁰изсуши от них и погуби их и потреби от земли память их.

²¹Не создана бысть человеком гордыня, ни гнев ярости рождением жен.

²²Семя честное кое? семя человеческое. семя честное кое? боящиися Господа.

²³Семя безчестное кое? семя человеческое. семя безчестное кое? преступающии заповеди.

²⁴Посреде братии старейшина их честен, и боящиися Господа пред очима его.

²⁵Богат и славен и нищь, похвала их страх Господень.

²⁶Неправедно есть укоряти нища разумива, и не подобает славити мужа грешника.

²⁷Вельможа и судия и сильный славни будут, и несть от них ни един вящший боящагося Господа.

²⁸Рабу разумиву свободнии послужат, и муж хитр не поропщет наказуемь.

²⁹Не мудрися творити дела своего, и не слави себе во время туги твоея.

³⁰Лучше делаяй и изюбилуяй во всем, неже славяйся и лишаяйся хлеба.

³¹Чадо, кротостию прослави душу твою и даждь ей честь по достоинству ея.

³²Согрешающаго на душу свою кто оправдит? и кто прославит безчествующа живот свой?

³³Нищий славимь есть вежества ради своего, и богатый славимь есть богатства ради своего.

³⁴Прославляемый же в нищете, а в богатстве кольми паче? безславный же в богатстве, а в нищете кольми паче?