Read Елизаветинская Библия, 1751 Сирах 14 Bible Online

Сирах 14 - Елизаветинская Библия, 1751 bible

Сирах 14

¹Блажен муж, иже не поползнуся устнама своима и не уязвися печалию греха.

²Блажен, емуже не зазре душа его, и иже не спаде от надежды своея.

³Мужеви скупому не лепо есть богатство, и человеку завидливу на что имение?

⁴Собираяй от души своея инем собирает, и во благих его инии насладятся.

⁵Иже себе зол, кому добр будет? и не возвеселится во имении своем.

⁶Завидящаго себе самому несть злейша: и сие воздаяние злобы его.

⁷Аще и добро творит, в забытии творит и на последок изявит злобу свою.

⁸Лукав (есть) завидяй оком, отвращаяй лице и презираяй душы.

⁹Око лихоимца не насыщается части, и обида лукаваго изсушает душу.

¹⁰Око лукаво завидливо и о хлебе, и на трапезе своей скудно.

¹¹Чадо, якоже имаши, добро твори себе, и приношения Господеви достойно приноси:

¹²помяни, яко смерть не замедлит, и завет адов не показан ти бысть.

¹³Прежде неже умреши ты, добро твори другу и по силе твоей простри и даждь ему.

¹⁴Не лишися от дне добра, и часть желания блага да не прейдет тебе.

¹⁵Не инем ли оставиши притяжания твоя и труды твоя, в разделение жребия?

¹⁶Даждь и возми, и освяти душу твою:

¹⁷яко несть во аде взыскати сладости.

¹⁸Всяка плоть яко риза обетшает, завет бо от века: смертию умреши.

¹⁹Яко лист расплощаяся на древе часте, ов убо спадает, другий же прозябает: такожде и род плоти и крови, ов убо умирает, ов же родится.

²⁰Всякое дело гниющее изчезает, и делаяй е с ним отидет.

²¹Блажен муж, иже во премудрости умрет и иже в разуме своем поучается святыни:

²²размышляяй пути ея в сердцы своем, и в сокровенных ея уразумится.

²³Изыди вслед ея яко изследник и на путех ея приседи.

²⁴Приницаяй сквозе оконца ея и при дверех ея послушает.

²⁵Обитаяй близ дому ея и вбиет кол в стены ея, поставит скинию свою вскрай ея и обитати будет во обители благих,

²⁶положит чада своя в покрове ея и под ветвьми ея водворится,

²⁷покрыется ею от зноя и во славе ея обитати будет.