Read Елизаветинская Библия, 1751 Сирах 15 Bible Online

Сирах 15 - Елизаветинская Библия, 1751 bible

Сирах 15

¹Бояйся Господа сотворит сие, и держайся закона постигнет ю.

²И срящет его яко мати, и яко жена девства приимет и:

³ухлебит его хлебом разума и водою премудрости напоит и:

⁴утвердится на ней и не преклонится, и до нея пристанет и не постыдится:

⁵и вознесет его паче искренних его и посреде Церкве отверзет уста его:

⁶веселие и венец радости и имя вечно наследит.

⁷Не постигнут ея человецы неразумивии, и мужие грешнии не узрят ея:

⁸далече есть от гордыни, и мужие лживии не имут помянути ея.

⁹Не красна похвала во устех грешника, яко не от Господа послана бысть:

¹⁰премудростию бо речена будет хвала, и Господь благопоспешит ей.

¹¹Не рцы, яко Господа ради отступих: ихже бо возненавиде, да не сотвориши.

¹²Не рцы, яко сам мя прельсти: не требует бо мужа грешника.

¹³Всяку мерзость возненавиде Господь, и несть любезна боящымся его.

¹⁴Сам из начала сотвори человека и остави его в руце произволения его:

¹⁵аще хощеши, соблюдеши заповеди и веру сотвориши благоволения.

¹⁶Предложил ти огнь и воду, и на неже хощеши, простреши руку твою.

¹⁷Пред человеком живот и смерть, и еже аще изволит, дастся ему.

¹⁸Яко многа премудрость Господня: крепок силою и видяй вся:

¹⁹и очи его на боящихся его, и той познает всяко дело человеческо.

²⁰Не заповеда ни единому же нечествовати и не даде ослабы ни единому не согрешати.