Read Елизаветинская Библия, 1751 Сирах 2 Bible Online

Сирах 2 - Елизаветинская Библия, 1751 bible

Сирах 2

¹Чадо, аще приступаеши работати Господеви Богу, уготови душу твою во искушение:

²управи сердце твое и потерпи, и не скор буди во время наведения:

³прилепися ему и не отступи, да возрастеши на последок твой.

⁴Все елико аще нанесено ти будет, приими и во изменении смирения твоего долготерпи:

⁵яко во огни искушается злато, и человецы приятни в пещи смирения.

⁶Веруй ему, и заступит тя, и управи пути твоя и уповай нань.

⁷Боящиися Господа, пождите милости его и не уклонитеся, да не падете.

⁸Боящиися Господа, веруйте ему, и не имать отпасти мзда ваша.

⁹Боящиися Господа, надейтеся на благая и на веселие века и милости.

¹⁰Воззрите на древния роды и видите, кто верова Господеви и постыдеся? или кто пребысть во страсе его и оставися? или кто призва его, и презре и?

¹¹Зане щедр и милостив Господь, и оставляет грехи, и спасает во время скорби.

¹²Горе сердцам страшливым и рукам ослабленым, и грешнику ходящу на две стези.

¹³Горе сердцу ослаблену, яко не верует: сего ради покровено не будет.

¹⁴Горе вам погубльшым терпение: и что сотворите, егда посетит Господь?

¹⁵Боящиися Господа не сумневаются о глаголех его, и любящии его сохранят пути его.

¹⁶Боящиися Господа поищут благоволения его, и любящии его исполнятся закона.

¹⁷Боящиися Господа уготовят сердца своя и пред ним смирят душы своя, (глаголюще:)

¹⁸да впадем в руце Господни, а не в руце человечески, яко бо величество его, тако и милость его.