Read Елизаветинская Библия, 1751 Сирах 20 Bible Online

Сирах 20 - Елизаветинская Библия, 1751 bible

Сирах 20

¹Коль добро есть обличити, нежели яритися тайно: и исповедаяйся от умаления возбранен будет.

²Коль добро обличенному явити покаяние:

³сей бо вольнаго избежит греха.

⁴Желание скопчо растлит ли девицу? такожде творяй нуждею суды.

⁵Есть молчай обретаяйся премудр, и есть ненавидимь от многия беседы.

⁶Есть молчай, не имать бо ответа: и есть молчай ведый время.

⁷Человек премудр умолчит до времене: продерзый же и безумный превосходит время.

⁸Умножаяй словеса мерзок будет, и восхищаяй власть возненавиден будет.

⁹Есть благопоспешство во злых мужеви, и есть изобретение на умаление.

¹⁰Есть даяние, еже ти не будет на пользу, и есть даяние, егоже отдание сугубо.

¹¹Есть умаление славы ради, и есть, иже от смирения вознесе главу.

¹²Есть купуяй многая малым и возвращаяй я седмерицею.

¹³Премудрый во словеси любезна сотворит себе: благодати же безумных излиются.

¹⁴Даяние безумнаго не упользует ти, очи бо его вместо единаго мнози ко восприятию:

¹⁵мало даст, а много поносити будет и отверзет уста своя яко проповедник: днесь взаим даст, а утро истяжет: ненавидимь человек таковый Господу и человеком.

¹⁶Буй речет: несть ми друга и несть хвалы благим моим: ядущии хлеб мой льстиви языком.

¹⁷Коликощи и колицы посмеются ему?

¹⁸Поползновение на земли лучше неже от языка: тако падение злых со тщанием приидет.

¹⁹Человек безблагодатен баснь безвременна: во устех ненаказанных присно будет.

²⁰От уст буяго отвержена будет притча: не имать бо ея рещи во время свое.

²¹Есть возбраняемый согрешати от скудости, и в покои своем не умилится.

²²Есть погубляяй душу свою за стыд, и от лица безумна погубит ю.

²³Есть ради стыда обещаяйся другови, и приобрете его врага туне.

²⁴Порок зол человеку лжа, и во устех ненаказанных присно будет.

²⁵Уне есть тать, нежели присно лжай: оба же пагубу наследят.

²⁶Обычай человека лжива безчестие, и студ его присно с ним.

²⁷Премудрый словесы произведет себе, и человек мудрый угоден будет вельможам.

²⁸Делаяй землю вознесет стог свой, и угождаяй вельможам умилостивит о неправде (своей).

²⁹Мзда и дарове ослепляют очи премудрых, и якоже бразды на устех отвращают обличения.

³⁰Премудрость сокровена и сокровище не явлено, кая польза есть во обоих?

³¹Лучше человек скрываяй буйство свое, нежели человек скрываяй премудрость свою.